61st IB kag 47th IB, mga berdugo nga batalyon, indi makapalagyo sa ila mga krimen sa pumuluyo!

Julian Paisano
Coronacion "Waling-Waling" Chiva Command, NPA-Panay
November 30, 2010

Ang pagbayluhanay sang destino sang 47th IB sa Panay kag 61st IB sa Negros sadtong una nga tunga sang Nobyembre isa ka tikang sang 3rd ID, PA agud mapalagyuhan sang mga nasambit nga yunit ang ila mga krimen sa pumuluyo.

Naglupok sining nagligad nga bulan lamang ang salabton sang 61st IB sa pagpatay kay Benji Bayles, lider masa sang NFSW, sa Himamaylan, Negros Occidental kag ang pagtinguha sang pamunuan sini sa idalum ni Lt. Col. Ricardo Bayhon nga taguon ang ila kahilabtanan sa krimen. Pinakaulihi lang ini sa malaba nga rekord sang mga krimen sang 61st IB, upod na ang pagtortyur nga gintunaan sang kamatayon sang mangunguma nga si Moreto Arcademia, ang pagpatay sa kay Bonifacio Galagati, Emilio Opinio kag Jaroy Martinez sang 2006 kag madamo pa nga kalakasan.

Ang 47th IB naman pila ka beses na nga aktibo nga naghinago sa pagtiro kag pagpamatay sang mga inosente nga sibilyan nga ginapatu-patuan lang nila nga mga NPA pareho sa nagabusong nga si Charito Caspillo sang Mayo, 2009, Ronilo Perez sa Mali-ao, Tapaz, Capiz sang Marso 19, 2010 kag iban pa nga malala nga paglapas sang tawhanon nga kinamatarong. Nabantog man ang yunit nga ini sa Tapaz kag Calinog sa ila pagiging utok sa pagpanakaw sang karabaw kag paghupot sa iban pa nga mga malain nga elemento. Wala pa nila mabayran hasta subong ang mga kahalitan sa propyedad kag ikaayong lawas sang mga pumuluyo nga biktima sang ila patarasak nga pagpanganyon paagi sa 105 howitzer sa Sityo Badas, Brgy Tacayan, Tapaz, Capiz sang Hunyo 29, 2009.

Pareho lang ang duha ka yunit nga ini sa mapintas kag mapaniplang nga pagtratar nila sa mga pumuluyo: ang mga pagpamatay, ang pagbutang sa katalagman sang kabuhi sang mga pumuluyo sa pag-insister nila nga magtener sa tunga sang baryo, mga taktikal nga interogasyon kag pagpahog sa mga ginadudahan nga lider masa, mga pagpangawat, kag pagharas sa mga sibilyan nga nagapamatok sa ila. Apang ang pagtuga nila sang kagamo kag kakugmat sa kabaryuhanan sa kabukiran amo man ang nagtudlo sa mga pumuluyo nga magbato kag magdugang kapagsik sa rebolusyon. Gani, naghalin lang ang duha ka batalyon sa ila mansig ka lugar nga wala sang ipabugal nga rekord sang pagpapas sa rebolusyonaryo nga pwersa, kundi naghalin sila nga mas mabaskog ang hublag sangsa ila una nga pag-abot.

Bahag ang ikog, nalagyo sila sa ila mansig ka lugar agud magpakuno-kuno naman sa pihak. Mahimo nga mapalagyuhan nila ang ila mga utang sa mga tiangge sa baryo kag sa mga ginpanghimuslan nga mga kababaihan. Apang indi nila mapalagyuhan ang kangil-ad sang pumuluyo nga magasulang sa ila bisan diin man sila idestino. Ang pumuluyo sang Panay kag Negros, kabulig ang NPA, ang magasilot sa mga berdugo nga ini. Indi nila mapalagyuhan ang padayon nga nagabaskog nga rebolusyonaryong kahublagan nga pat-ud nga magasukot sa ila mga krimen.