Labanan sa Brgy. Dikapinisan: 48th "Cedula/Berdugo" Battalion, Patuloy na Lumalasap ng Pagkatalo!

Ka Rowena Servante
Domingo Erlano Command,, NPA Aurora
AUgust 25, 2011

Isang engkwentro ang naganap sa pagitan ng mga pwersa ng NPA Aurora at mga tropa ng 48th "Cedula/Berdugo" Battalion sa kabundukan ng Brgy. Dikapinisan, San Luis, Aurora noong Agosto 23, 2011. Ito ay nagsimula ng ganap na alas-6:30 ng umaga. Naka-maniobra palayo ang yunit ng NPA pag-abot ng alas-7 ng umaga. Nagpatuloy ang walang direksyong pagpapaputok ng mga militar hanggang lampas tanghali nang magdatingan ang kanilang sumaklolong helicopter.

Malaki ang pinsala ng mga sundalo ng 48th IB. Ayon sa mga mapagkakatiwalaang mga impormante sa hanay mismo ng militar, pulisya, at marami pang mga sources ng kilusan, aabot ng 7 ang napatay na mga sundalo sa labanan, at 6 ang mga sugatan. Ilan sa mga patay at sugatang sundalo ay hinakot mula sa kabundukan ng Dikapinisan gamit ang helicopter. Sa takot na mabaril ng mga isnayper na NPA, pinagbabaril pa muna ng helicopter ang kabundukan at nagpasabog ng bomba kahit wala namang target. Ito ay para maisakay ang mga tinamaang sundalo at madala sa mga pagamutan. Ipinapaabot ng mga sources ng NPA na 7 ang patay na nakasakay sa helicopter na dumating ng PNP Provincial Headquarters sa Camp Ravina, ganap na alas-4:30 ng hapon noong Agosto 23.

Ang ibang sugatan ay isinakay sa bangka at nakaduong sa Baler Fishport sa Brgy. Zabali, Baler alas-9 ng gabi ng Agosto 23. Nakita ng mga taong naroroon noon ang anim na sugatang sundalo. Tatlo sa kanila ang may tama sa katawan, dalawa ang may tama sa likod, at isa ang may tama sa paa.

Higit pa sa dami ng mga napatay at nasugatang mga sundalo, ang labanang ito ay lalong nagdidiin sa mga sampal sa mukha ng 48th "Cedula/Berdugo" Battalion, AFP, ng dinastiyang Angara at ng papet na gobyerno na nagdeklarang "Insurgency Free" na ang Aurora. Wala nang naniniwala sa kanilang mga kayabangan na nagapi nila ang rebolusyonaryong kilusan sa lalawigan. Nagbibigay ito ng malaking inspirasyon at pag-asa sa mga mamamayan ng Aurora na magpursige sa pakikibaka laban sa malawakang pangangamkam ng lupa ng pamilyang Angara at ng gobyerno, lalo na ang proyektong APECO o Aurora Pacific Economic Zone.

Ang labanang ito ay pang-lima na sa loob ng 6 na linggo. Ang unang labanan ay noong Hulyo a-10 na naganap sa Brgy. Dierabasin, Dipaculao. Ang ikalawa ay noong Hulyo 11 nang paulanan ng bala ng isang yunit NPA ang detachment ng mga CAFGU sa Sitio Dimutol, Dianawan, Maria Aurora. Ang pangatlo at pang-apat ay ang harassment sa mga sundalong nang-agaw sa barangay hall ng Brgy. Diteki, at ang sumunod na pagkaka-ambush ng mga nag-reinforce na tropa na kinaroonan pa ng kanilang Battalion Commander na si Lt. Col. Kurt Decapia. Sa lahat ng limang labanang ito, walang seryosong pinsala sa panig ng mga NPA. Isang sibilyan naman ang pinatay ng mga militar at pinapalabas na ito ay NPA matapos ang labanan sa Dierabasin. Dapat itong panagutan ng 48th IB.

Patuloy din na ginigipit ng mga militar ang mga naninirahan sa Brgy. Diteki upang palabasin na suportado sila ng mamamayan doon. Nais nilang magtago sa palda ng mga sibilyan para pagtakpan ang kanilang mga pagkatalo. Bago pa man ang ambush sa Diteki, malaon nang nagpalaganap ng sindak ang naturang "berdugo/cedula" battalion sa pamamagitan ng mga pamamaslang at harassment. Matapos ang ambush, hayagang binantaan ng mga militar na "iwawala" ang mapapatunayang mga suporter ng NPA. Tinutukan din ng baril ang isang Balong Genes habang papunta sa kanyang ulingan noong Agosto 14 at pinalikas sa kanilang mga bahay ang mga nakatira sa sityo Sablang. Sa takot ng ilang sibilyan na pag-initan ng mga militar ay pakunwari silang umaayon sa mga sinasabi ng AFP, at sumasama pa nga sa ilang aktibidad nila. Ang pinapalabas nilang mga "pahayag" ng mga taga-Diteki na tumutuligsa sa naganap na ambush ay kinopya lamang sa mga anti-NPA rally na inorganisa ng mga militar noong panahon ni Gen. Palparan. Kahalintulad ito sa kaso ng pagpasok ng ilang mga sibilyan sa mga Barangay Security System at Youth Leadership Seminar ng 48th IB para lamang hindi sila pag-dudahan ng kilabot na batalyon, kaya lihim namang nakapasok ang mga pwersa ng rebolusyonaryong kilusan sa mismong mga kontra-rebolusyonaryong samahan na itinayo ng militar.

Muli, nais namin ipahayag: binigo ng NPA ang mga pinakamalaking operasyon ng Oplan Bantay Laya mula 2005-2010 dahil sa suporta ng mamamayan. Higit na determinado ang NPA-Aurora na biguin ang Oplan Bayanihan ng AFP at lalong na palakasin ang paglaban ng mamamayan hanggang sa tagumpay ng rebolusyon!

Asahan pa ang mas maraming mga opensiba!
###