Maria Malaya
NDF - Northeast Mindanao
December 18, 2011

Giplano gyud sa mga gerilyang yunit sa BHB sa Front 30 sa Surigao del Sur ang pag-atake sa usa ka team sa COPD/RSOT sa 36th IBPA sa unang adlaw sa pagdeklara sa ceasefire sa gobernong US-Aquino. Gihimo kini aron sa pagmatuod nga susama sa miaging mga ceasefire dili matinud-anon ang mga tropa sa AFP nga motuman sa ilang kaugalingong ceasefire kay nagpadayon sa mga military operasyon sama sa COPD/RSOT.

Gihulat sa mga yunit gerilya sa BHB nga mobalik na sa ilang kampo ang team sa COPD/RSOT. Sa dihang nagpadayon ang ilang operasyon militar ug sa mga reklamo sa mga baryohanon sa pagkahasi nila sa presensya sa COPD/RSOT sa 36th IB PA nadesisyonan nga ikasa ang maong pag-atake. Ang giatake mao ang COPD/RSOT sa 36th IBPA nga didto nagkampo sa barangay hall sa Mabuhay, Tandag City, Surigao del Sur, alas 5:30 sa kabuntagon ning tuiga.

Kining siyam ka tawo nga team sa COPD/RSOT nagsugod sa bulan pa sa Septembre nga nagresulta pagkahasi sa mga baryohanon ug duna nay taas nga listahan sa pagpanglapas sa tawhanong katungod. Nalipay na unta ang mga tagibaryo sa sayo ra nga pag-anunsyo og ceasefire sa gobernong Aquino sa paghunahuna nga maoundang usa ang maong mga army sa ilang Civil Military operation. Gihimong kampo sa COPD/RSOT ang barangay hall sa maong baryo sukad sa Septembre 2011.

Gisulong sa BHB sa may alas 5:30 sa kabuntagon ang usa ka iskwad sa COPD/RSOT ug mikabat sa usa ka oras ang sinukliay sa mga bala. Nagresulta kini sa pagkapatay sa lima ka sundalo ug midagan ang duha. Nakuha sa BHB ang siyam ka tag-as kalibreng armas nga gilangkoban sa lima (5) ka M14 uban sa 37 ka magazine ug 500 ka bala; duha (2) ka M16 lakip 20 ka magazine ug 400 ka bala; usa ka M203 may 12 ka bala; usa K3 machinegun nga may 300 ka bala ug usa ka .45 nga pistola. Ang unom ka military pack nga nakuha sa mga Pulang Manggugubat gikan sa membro sa COPD/RSOT tanan adunay sulod nga daghang Marijuana.

Tungod kay ang COPD/RSOT usa ka porma sa operasyon militar, GIAWHAG ang tanan yunit sa BHB ubos sa Pulang Diwata Command-BHB NEMR nga ipadayon ang mga aksyon militar isip pagsilot kanila. Sa panahon nga modeklara na ang nasudnong sentro sa atong kaugalingong ceasefire, giawhag ang tanan sa hugot nga pagtuman sa mga probisyon niini. Padayong matngon sa sekretong paglihok ug hugot hawiran ang inisyatiba militar batok sa mga posibleng patraydor nga ataki sa kaaway.

Mga rebolusyonaryong pagsaludo ngadto sa mga Pulang Manggubat sa Front30 sa ilang malamposong aksyon militar.

Mga rebolusyonaryong pagsaludo usab ngadto sa mga Pulang Manggugubat sa Front 19 sa ilang malamposong reyd-way-buto nga pagsulong sa BJMP o provincial jail nga anaa sa Lianga, Surigao del sur niadtong petsa 15 ning bulana. Nakuha sa BHB ang usa AK47 apil mga bala, 3 ka pistola ug usa ka shotgun.

Tigpamaba, NDF-NEMR
Disyembre 18, 2011