Konkondenarin ti SLF ti Inuulbod a Pablaak ti 503rd Brigade Mainaig iti Labanan iti Sal-lapadan

Saulo Lumadao Front, NPA South-Central Abra
Agustin Begnalen Command
7 Pebrero 2012

Nairut a konkondenarin ti Saulo Lumadao Front-NPA South-Central Abra ti inuulbod a pablaak ti 503rd brigade iti napasamak a labanan sadiay Sitio Nagas-asan, Brgy. Ud-udiao, Sal-lapadan, Abra idi Pebrero 3, 2012.

Idi umuna a pablaak ti 503rd brigade, ilaslastog da nga adda tallo nga NPA ti natay iti nasao a labanan. Idi damag met idi agsapa ita nga aldaw, nagbalin nga maymaysa nga NPA ti natay kano iti benneg iti NPA nga ag-alyas iti “Ka Adi.” Idi met alas 6:00 ti rabii idi mismo nga aldaw ti labanan, napan dagiti opisyal ti barangay ti Ud-udiao ken dagiti iinna iti area ti labanan tapno kitaen nu adda nadangran. Napan inlastog dagiti tropa ti AFP kenyada dagiti tallo a nabungon a bangkay kano dagiti babbai nga NPA. Idi ipakada dagiti iinna nga kitaen dagiti bangkay ket saan nga pinalubusanen dagiti soldado.

Awan pulos kinapudno na ti padamag ti AFP nga adda natay nga NPA. Kadagiti impadamag da ket makitan dagiti nawara-wara ken awan kinapudno a pablaak iti bilang ken nu siasinno man ti natay iti nasao a labanan. Desperado la unay dagiti tropa ti AFP nga sumurot iti diktar dagiti opisyales da ken ti Rehimen a US-Aquino isu nga nadumaduma nga kalastogan ken kinaulbod ti ipadpadamag da.

Nagrugi ti aktwal a labanan iti baet ti NPA ken dagiti tropa ti 52nd Division Recon Coy idi 11:15am ti agsapa. Nadungpar dagiti tropa ti AFP ti maysa a nagyanan ti kakadua. Maisupadi iti ibagbaga ni Capt. Sia-ed, daytoy a lugar ket simple nga nagturugan ti kakadua, ket nalawag nga saan a kampo ti NPA.

Numan pay umuna a pimmutok dagiti tropa ti 52nd Recon Coy, inmentina dagiti gerilya a mannakigubat ti posisyon da ken napinget a nakilaban inggana alas 2:00 ti malem. Bayat nga makilablaban ket dagus nga nadangran dagiti dua a tropa ti militar ngem awan nadangran wenno natay iti benneg met ti NPA. Natalged a nakaatras ti kakadua idi 2:30 ti malem bayat a tuloy-tuloy met nga agputputok dagiti tropa ti AFP iti kabulbuluhan. Adda pay simmangpet a lugan nga reinforcement da idi 2:50 ti malem a naglaon iti 12 a katao ngem saan latta nanayunan ti tured dagiti mabaybayadan a soldado. Bimmayag latta ti panag-assault dagiti AFP inggana alas 6:00 ti rabii gapu iti nakapsut a pakinakem da isu nga agduadua da nga umabante. Tunggal maysa nga oras ti panag-asiddeg da iti naggianan ti NPA.

Uray ad-adu pay ti bilang ti kabusor, napipigsa dagiti armas da ken isuda ti umuna a pimmutok, saan latta a nadangran dagiti tropa ti Recon Coy dagiti NPA. Uray nu dagiti Recon Coys ket makunkuna a fighting unit ti AFP ket agduadua da met laeng a makilaban. Bayat nga ti NPA ket addaan palaban a pakinakem ken adda nairut a panagkaykaysa dagiti opisyal ken kawal na isu nga adda iti NPA ti bentahe.

Ipakpakita laeng daytoy a labanan ti superyoridad ti New People’s Army ngem iti mabaybayadan a tropa ti AFP. Bayat nga ti AFP ket salsalakniban na ti interes dagiti dadakkel a kompanya ti minas ken dagiti agturturay a dasig, ti NPA met ket pudno nga agserserbi para iti interes ti nalawa nga umili. Nalawag nga ti NPA ti husto nga hukbo ti umili nga saan nga agduadua a lumaban ken kinanayon a nakasagana a sumango iti aniaman a rigat, sakripisyo ken uray patay ta ammo na nga husto ti ipagpagna na a gubat tapno magun-od ti pudno a wayawaya ken demokrasya. Rugi pay laeng iti maikadua a tawen ti Oplan Bayanihan, makita a sigurado a mapaay latta ti panggep ti AFP a rebbeken ti NPA ta adda iti NPA ti nalawa a suporta ti umili.

Kokondenarin met laeng ti Saulo Lumadao Front dagiti surrenderees a makitinnulong ken agpapausar kadagiti AFP laban iti NPA. Ti NPA ket kinanayon a nakasagana tapno dusaen dagiti naranggas ken manang-allilaw a tropa ti AFP. Tuloy-tuloy a rebbeken ti NPA isuda inggana maipagballigi ti Demokratiko a Rebolusyon ti Umili.