Subling Milagsik ug Mikusog ang Rebolusyunaryong Gubat sa Western Mindanao

Jorge “Ka Oris” Madlos
Tigpamaba
NDFP-Mindanao

Sa may alas 7: 00 sa gabii sa Abril 09, 2012 malamposong gi-raid nga walay buto ug gidis-armahan sa BHB sa Western Mindanao Region ang upat ka pulis sa headquarter sa PNP sa lungsod sa Tigbao, Zamboanga del Sur. Sa maong aksyong militar, nakumpiska sa BHB ang mosunod nga armas: unom ka m16; usa ka baby armalite; usa ka m14; 2 ka 9mm pistola; 1 ka .38 rebolber; mga best sa bala ug ubay-ubay nga bala. Nakumpiska usab ang usa ka laptop nga computer.

Mikabat lang sa 30 minutos ang maong operasyon sa BHB, dali ra na-kontrol kay pulos hubog ang upat ka mga pulis nga naa sa headquarter sa maong panahon. Sulod sa maong panahon gikontrol usab sa BHB ang national highway pinaagi sa pagmontar ug mga checkpoints.

Gidala sa yunit sa BHB isip POW (Prisoner of War) si PO2 Faizahl M. Juhaili nga dunay serial number sa PNP nga #056452. Duna kini 7 ka anak ug nagpangidaron og 50 anyos. Usa lang ang gidala isip POW tungod sa tawhanong konsiderasyon kay ang laing tulo ka pulis pulos naay problema sa panglawas. Among ipasalig sa pamilya ug kaparyentihan ni POW PO2 Juhaili nga trataron siya pinasikad sa Comprehensive Agreement on Respect for Human Rights and International Humanitarian Law ug International nga Balaod sa Gubat.

Gitumong nga atakihon ang munisipyo tungod kay ang lokal nga kagamhanan niini nga lugar namugos sa katawhan nga dawaton ang large scale nga mina sa lugar. Dunay mga report sa pagpangilog sa yutang kabilin sa katawhang lumad ug pagpamig-ot kanila sama sa pagdili sa pagputol og kahoy bisan alang lang sa ilang pagbalay. Ang mayor ug lokal nga mga opisyales wala manalipod ug walay pagpakabana sa katawhan atubangan sa mga kalapasan sa tawhanong katungod sa mga militar. Ang kapulisan aktibo usab sa paggukod sa rebolusyonaryong kalihokan.

Kini nga raid pagtubag usab sa panawagan sa nasudnong sentro sa BHB sa pagpakaylap ug pagpakusog pa sa mga taktikal nga opensiba sa Mindanao ug sa tibuok nasud.

Kun mahinumdoman, niadtong Pebrero 22, 2012, giambus usab sa BHB ang joint operasyon sa 53rd IB ug PNP didto sa Brgy Ariosa, munispyo sa Molave, Zamboanga del Sur. Sa maong taktikal nga opensiba, 15 ka kaaway ang namatay, ug dunay 10 nga angol. Sa bahin sa BHB walay kaswalti.

Kining sunod-sunod nga panghitabo nagpakita nga subling milagsik na usab ang rebolusyonaryong armadong pakigbisog sa Western Mindanao Region sukwahi sa gipahayag sa 1st “Tabak” Division sa AFP, nga napuo na ang mga rebolusyonaryo sa Western Mindanao. Gi-pahalipayan sa NDFP-Mindanao ang BHB ug tanang rebolusyonaryong pwersa sa Western Mindanao tungod sa ilang gipakita nga kamapangahason. Gipahalipayan usab sa NDFP-Mindanao ang katawhan sa Western Mindanao tungod sa subling paglagsik ug pagkusog sa ilang hukbo, ang Bagong Hukbong Bayan.

Mabuhay ang Bagong Hukbong Bayan!

Mabuhay ang katawhang dinaugdaug ug pinahimuslan!