Baratunon ni Aquino an pagpatay kan Willem Geertman

Luis G. Jalandoni
Chairman, NDFP Negotiating Panel
4 July 2012


Waray translation of: Aquino must be held responsible for the murder of Willem Geertman
Hugot nga ginkokondenar han National Democratic Front of the Philippines (NDF) an brutal nga pagpatay kan Willem Geertman, 67 anyos, usa nga Dutch nga development worker nga nagserbe ha katawhan Pilipino ha sakob hin masobra 40 anyos.

Ginpatay hiya atubangan han iya opisina ha Angeles City, Pampanga, hadton udto han Hulyo 3, 2012. An duha nga parupanmatay nga nakasakay hin motorsiklo gintutuohan nga kaparte han death squad han rehimen ni Benigno Aquino III. Nahitabo an panmatay ha opisina han Alay Bayan Inc. (ABI) kun diin Executive Director hi Willem Geertman.

Kilalado hi Willem komo tag-undong han mga katungod han mga parag-uma. Madig-on hiya nga nasuporta ha mga parag-uma ngan mga trabahador han Hacienda Luisita. Waray hiya kapagalan nga nabulig ha mga biktima han pagbahan ngan iba pa nga mga kalamidad. Hugot hiya nga natipa ha panlupot hin tuna. Nakigbisog hiya para ha mga katungod han mga nasyunal nga minoriya para ha ira ansestral nga katunaan ngan kontra ha mapanhibang nga mga operasyon ha pagmimina.

An pagpatay ha iya kasunod han nakalabay nga ekstrahudisyal nga pagpatay han Italyano nga misyonaryo, hi Fr. Faustino “Pops” Tentorio, usa nga makababaraka nga senyales ngan an langyaw nga mga misyonaryo ngan mga development worker target liwat han makinarya han pagpatay han rehimen Aquino ha panahon nga hugot hira nga nasuporta ha mga parag-uma, trabahador, ngan nasyunal nga minoriya nga nakikigbisog para ha reporma ha tuna ngan natipa ha mapanhibang nga langyaw nga mga korporasyon ha pagmimina.

Kinahanglan magbaton hi Presidente Aquino para hini nga ika-81 nga ekstrahudisyal nga panmatay ilarum han iya pangatungdanan. Diri la na napakyas hiya ha pagsirot ha mga nanmatay ngan nandarambong ilarum han rehimen Arroyo, iginpapadayon niya an pareho nga palisiya han ekstrahudisyal nga mga panmatay, enforced disappearances ngan iba pa nga mabug-at nga mga pagtalapas ha tawhanon nga katungod.

Padayon niya nga gindedetenir an 350 detenido politikal nga pagtalapas ha 1998 Comprehensive Agreement on Respect for Human Rights and International Humanitarian Law (CARHRIHL), nga ginpirmahan han Gobyerno han Republika han Pilipinas ngan han National Democratic Front of the Philippines (GRP-NDFP). Mas grabe pa, tikadamo nga mga detenido politikal an iya gindedetenir ngan gin-aakusaran hira hin mga komon nga mga krimen sugad han murder, arson, robbery, iba pa nga pagtalapas ha CARHRIHL ngan han Hernandez nga doktrina han pampolitika nga kasal-anan.

Minayuyo hi Willem Geertman han katawhan nga iya ginserbihan ngan kanay kawsa iya gindepensan ngan gin-undong. Ha langyaw nga labnasan, damo an iya mga kasangkayan. Para makakuha hin suporta para ha iya iba-iba nga programa para ha katawhan, nag-iimbitar hiya nga mga bisita tikang ha European Union ngan Caritas International,labot han iba pa. Membro hiya han usa nga progresibo nga grupo nga pan-singbahan, an Calama, nga suok ha mga komunidad ha Latin America. Nagin suok hiya nga sangkay ni Bishop Julio Labayen ngan iba pa nga tawuhan han singbahan. Ha iya nasud nga gintikangan, an Netherlands, may-ada hiya mga kapamilya, mga kaurupdan ngan kasangkayan.

Ini ngatanan nga mulupyo, kanay mga kinabuhi hiya nagin kaparte, nagdedemanda yana hin HUSTISYA PARA KAN WILLEM GEERTMAN! An pakigbisog han katawhan ha katapus-tapusan maghahatag hin hustisya kan Willem Geertman ngan iba pa nga mga martir ngan mga bayani han katawhan.