Pagpatay kang Genesis Ambason: Laing dagway sa nagkasubsob nga kampanyang pagpanumpo sa Oplan Bayanihan

Omar Ibarra
Cesar Cayon Command, NPA-Western Caraga
September 18, 2012

Dili gayud madawat sa 23rd  IB ug CAFGU ang ilang mga kapildihan nga naangkon sa Agusan del Sur. Sa kapakyas nga magukod ang yunit sa New People's Army nga mi-reyd sa ilang gipanghinambog nga "kinakusgang" Army-CAA detachment sa Binicalan, San Luis kaniadtong Mayo, ang mga sibilyang nanginabuhi sa lugar na ang ilang gipahimungtan. Kung niadtong Hunyo gidakop ug gipasanginlang NPA ang unom ka Banwaon sa sikbit nga baryo sa Mahagsay gikan nagbaligya sa ilang biniling nga bulawan. Niining panahona gipatay ug gikawat sa sundalo ug CAFGU ang halin sa bulawan sa laing mamilingay nga taga-barangay Balit.
Kaniadtong Septembre 13, alas 9:30 sa kagabhion, gipusil patay si Genesis Ambason minyo, 24 ang edad, sa Km 40 Binicalan, San Luis, Agusan del Sur. Si Genesis Ambason usa ka batan-on ug aktibong lider sa Tagdumahan, organisasyon sa tribong Banwaon nga maisugong nagabarug sa pagpanalipod sa ilang yutang kabilin ug batok sa pagpanglapas sa katungod sa mga Banwaon. Usa siya sa nangulo sa hiniusang pagbaligya sa ilang biniling nga bulawan.
Gikan siya sa Barangay Balit kuyog ang laing unom ka mamilingay padulong sa Km 45 Tambo, Binicalan aron manginabuhi sa pagbiling-biling sa Bulawan sa sityo Tambo. Dala nila ang cash nga halin sa bulawan, mga pala ug ubang pang himan ug suplay pagkaon alang sa usa ka semana nga pagbiling. Tungod sa kaguba sa dalan nagabhian ang ilang panon ug gipauna nila ang duha nila ka kaubang babae sakay sa motor. Nagbaklay na lang si Genesis kuyog sa upat ka lalaki, bitbit ang ilang mga himan pamiling. 
Sa pagpamahulay nila tunga sa dalan sa Km 40, samtang nanigarilyo ug nagkukabildo, kalit may miwara nga ispat punting kanila ug dayon silang girakrakan sa pusil. Luwas nga nakadagan ang upat niya ka kauban, apan nabiyaan si Genesis sa iyang gikahagbaan. 
Pagkaugma, didto na nakuha sa iyang mga paryente ang iyang patayng lawas mismo sa giabandonang kampo sa army-CAA human kini sulunga niadtong Mayo sa Kilometro 41, Binicalan, Agusan del Sur. 
Ikatulo na kini nga kaso sa extrajudicial nga pagpamatay sa mga pangmasang lider sa rehiyon karong tuiga. Una, si Jimmy Liguyon, ang lider-Matigsalug ug kapitan sa Dao, San Fernando, Bukidnon tungod sa iyang lig-ong pagsupak sa pagsulod sa dagkung operasyon sa mina nga moilog ug moguba sa yutang kabilin sa mga Matigsalug. Ang ikaduha, mao si Boy Cabal sa Kibawe, Bukidnon nga gipatay tungod sa iyang pagduyog sa kalihukan sa mga lumulupyo nga kusganong nagsupak sa pagtukod sa higanteng dam sa suba sa Pulangi nga mosanap sa 24 ka baryo. 
Kining duguong pagpanumpo sa dayag, ligal ug makatarunganong pagsupak sa katawhan sa pagpanghingusog sa ilang katungod batok mga makilangyaw nga mga programa ug proyekto sa nagharing hut-ong ilalum sa rehimeng US-Aquino tataw nga nagapakita sa pagpadayon sa palisiya sa pagpamatay sa rehimeng US-Arroyo. Pagpakaaron-ingnon lang ang pasiatab sa gobyernong Aquino sa paggukod kuno sa nagtago-tago nga Palparan ug iyang mga uhaw-sa-dugo nga mga hinanib tungod sa ilang mga krimen sa pagpamatay ug pagpanglapas sa tawhanong katungod. Sa pagkatinuod, anaa gihapon ang tipong-Palparan nga pagpamatay ug ang mga kriminal nga sama ni Butsoy Salusad nga maoy nagpatay kang Jimmy Liguyon padayong nanghasi sa mga Matigsalug ug gawasnong nagasuroy-suroy lang sa San Fernando kuyog sa mga sundalo sa 8th IB.
Ubos sa kontra-rebolusyonaryong Oplan Bayanihan, buot sa rehimen nga hingpit nga pahilumon ang katawhan aron wala nay mobabag ug maseguro nga luwas ang mga interes ug pamuhunan sa langyaw ug lokal nga nagharing hut-ong sa Pilipinas. Gawas sa pagpamatay, gipasakaan og kaso ang daghang mga pangmasang lider nga nagbarug alang sa kaayuhan sa ilang katawhan ug komunidad. Sa pagkakaon, mokabat na sa 92 ka mga lider mag-uuma ug Lumad ang gipangkasuhan sa Caraga ug padayon pang nagasaka ang ihap. 
Ang kasinatian sa katawhan panahon sa paghari sa diktadurang US-Marcos nagtudlo kanato sa mga pagtulun-an ug nag-abli sa lapad nga wanang sa kamamugnaon sa pagsukol. Busa atubangan niining hitabo, dili angayang mahuyang o magpadala sa kahadlok ang katawhan. Ang ingon niining pasistang lakang nga gisagop reaksyunaryong estado padayong natong maisugong ibutyag ug batukan. Kusganong ipakigbisog ang pagpangayo og hustisya alang kang Genesis ug sa uban pang mga biktima sa pagpamatay ug pagpanglapas sa tawhanong katungod. Kung dili na magsilbi ang mga ligal nga pamaagi, lakip na ang pagpasaka og kaso sa reaksyunaryong korte, abli kanunay ang inyong tinuod nga hukbo, ang New People's Army, sa pagdawat niadtong andam nang modangop sa armadong pagsukol. 
Omar Ibarra
Tigpamaba, 
Cesar Cayon Command