16 ka Sundalo Patay, 4 ka Armas Nasakmit sa sunod-sunod nga Panagsangka tali sa NPA ug AFP


Allan Juanito
NPA-Northcentral Mindanao Region
Marso 19, 2013

Gisugat sa New People’s Army- North Central Mindanao Region ang taliabot nga kasaulogan sa ika-44 nga Anibersaryo sa NPA karung Marso 29 pinaagi sa sunod-sunod nga mga aksyong militar nga nagresulta sa pagkamatay sa 16 sa reaksyunaryong tropa, ug pagkasakmit sa upat ka armas.

Marso 13 sa hapon - nagpahigayon og tsekpoynt ang yunit sa NPA sa Brgy. Bonbon, Butuan City ug gidis-armahan ang duha ka opisyal sa PNP nga sila SPO1 Walter Suralta ug PO3 Romulo Lagarde. Nasakmit gikan sa mga pulis ang usa ka 9mm nga pistola. Giambush gilayon sa mga Pulang manggugubat ang reimporsment gikan sa 58th IB ug Regional Mobile Group. Walo ang napatay sa mga nagrespondeng tropa, tulo niini ang mga sundalo ug lima ang mga pulis. Samaron ang lain pang pulis. Sa pikas bahin, organisadong nag-withdraw ang mga NPA sa luwas nga dapit nga walay kaswalidad.<1-- --="" more="">

Marso 14- gidis-armahan sa laing yunit sa NPA ang bata-bata sa kapitan sa Brgy. Cahayagan, Carmen, Agusan del Norte. Nasakmit gikan sa maong pagdis-arma ang usa ka shotgun ug usa ka .22 rifle.

Marso 15 alas 6 sa buntag - laing pagdis-arma ang napahigayon sa Sityo Mahayahay, Brgy. Lunotan, Gingoog City. Nasakmit sa maong operasyon ang armas ni Cesar Labitad nga usa ka NBI agent. Nakuha gikan sa mga kamot sa iyang sinaligang ex-CAFGU nga si Toto Torion ang usa ka .38 rebolber, ug lain-laing bala. Daghan ang nagmulo kang Torion sa pagpabuto ug pagpanion gamit ang armas ni Labitad.

Marso 15 sa alas 3 sa hapon - na-engkwentro sa usa ka yunit sa NPA ug tropa sa 58th IB sa Sityo Minlangit, Rojales, Carmen, Agusan del Norte. Sa sinukliay sa bala, 5 sa mga sundalo ang napatay. Pagka-ugma, gipugos sa mga sundalo ang mga motorista sa pagkarga sa katig sa ilang motor sa mga patay nga medyo nag-decompose na. Walay namatay o samaron sa bahin sa NPA gawas sa nabilin niini nga 20 ka paresan sa mga militar nga uniporme, eksplosibo ug 8 ka bag sa mga personal nga mga gamit.

Marso 17, alas 8 sa buntag - gitagbo og harassment sa NPA ang mga nag-operasyong sundalo gikan sa 58th IB didto sa Sityo Alicapawan, Brgy. Manoligao, Carmen, Agusan del Norte. Tulo ang patay sa mga reaksyunaryong sundalo. Sa laing bahin, walay kaswalti ang yunit nga nangharas.

Ang magkasunod nga mga aksyong militar sa NPA sa Amihanang Sentral Mindanao kabahin sa pagtubag niini sa nasudnong panawagan sa pagpasubsob sa gubat sa katawhan aron makab-ot ang yugto sa estratehikong pagkapatas sa gubat sa katawhan.
Pinirmahan

(pinirmahan) ALLAN JUANITO
Tigpamaba
New People's Army- North Central Mindanao Regional Command (NPA-NCMRC)