Ang kamatuoran luyo sa pinusilay atol sa Station of the Cross Sa Anticala, Butuan City

Front Command for Operations
Front 21, North Eastern Mindanao Region
April 7, 2013

Usa kini ka report sa kaugalingong imbistigasyon sa NPA Front 21 Command kalambigit sa pagpusil- patay sa duha ka CAFGU, atol mismo sa prosesyon sa “Way of the Cross” sa kapin 3,000 ka debuto sa Biernes Santo sa Brgy. Anticala, Butuan City.

*Kronolohiya sa Panghitabo*

*Marso 1 hangtud Marso 7.* Nag-operasyon ang 9th SF Coy nga ubos sa 3rd SF Bn sa Mt. Ilong-Ilong niadtong Marso 1 hangtud sa Marso 7. Unom ka beses nga nabirahan kini sa mga snipers sa NPA ug napatyan sa 8 tanan ka sundalo sa militar. Sa duha sa maong unom ka beses nga isnayping, ang giya sa operasyon mao ang usa ka CAFGU nga si Ariel Dawog Anduhuyan, 18 anyos, ulitawo, kung diin napatyan ang tropa sa army.



*Marso 16 .*  Gipangita si Ariel sa iyang inahan kay wala na makauli nga unta ang iyang duty nagsugod sa Marso 1 hangtud sa Marso 15. Ang tubag sa army tua na-assayn si Ariel sa ubang kampo. Nabaniog nga namatay na si Ariel sa banatan apan walay lawas nga magpamatuod niini.

*Marso 23, 2013*. Gipatawag ni Sgt. Arthur delos Reyes sa Sityo Mahayahay CAA detachment si Sito Adu, usa ka aktibong asset sa militar nga nagpuyo sa Sityo Mahayahay, Brgy. Anticala, Butuan City, aron sugoon kini sa pagpalit og suplay para sa nag-operasyon nga army.

*Marso 24*. Sa buntag, nagpatrolya ang mga CAFGU sa Mahayahay ug niabot sa Sityo Tagkiling ug Somoloy, nga sakop sa Tagkiling. Alas-dose sa gabii, 2 ka motor ang nagkarga sa 3 ka sako nga bugas, 6 ka container ug ubang pagkaon nga gihatud ni Sito Adu uban sa 2 ka CAFGU nga sila Kris Linggo ug Kulot, ug 3 ka sibilyan didto sa yuta ni Tibor Samusino, sa Quarry, Sityo Dugyaman, Brgy. Anticala.

*Marso 25*. Pag-uli sa uban nga naghatud sa suplay, nabilin si Sito Adu aron bantayan ang suplay. Sa gabii misulod ang tropa sa 9th SF Coy sa Sityo Dugyaman. Aduna usab misulod nga tropa sa army sa Lambingan, bukid kini nga sakop Sityo Iyao.

*Marso 26*. Naay usa ka kolum sa 9th SF Coy sa kilid sa sityo Dugyaman, ug laing usa ka kolum sa Side 3, Tagkiling, sakop sa Brgy. Anticala. Laing usa ka kolum usab sa bukid sa Bunduan nga mipaingun sa bukid sa Mahingpit ubos sa Mt. Ilong-Ilong sa San Antonio, sakop sa lungsud sa RTR.

*Marso 27*. Nakit-an ang pwersa sa 9th SF Coy nga mipadulong sa direksyon sa Bantawon, apan mituyok ra ug mipundo sa yuta ni Nestor Nalam.

*Marso 28*. Mi-abante ang 9th SF Coy sa Bantawon. Sa gabii, nag-road security na daan ang pwersa sa PNP ug CAFGU sa karsada nga ruta sa prosisyon sa Sityo Iyao nga padulong sa Mahayahay.

*March 29*. Ang pakisusi sa mga kauban sa mga lumulupyo ug nakaapil sa prosisyon nagbutyag nga:

Alas-2 sa kaadlawon, ang 9th SF Coy ubos sa 3rd SF Bn mipaubos gikan sa Sityo Mahayahay, padulong sa ruta sa prosisyon. Kaadlawon sa wala pay buto-buto, naay tropa sa militar nga gi-drop sa Bugsokan gikan sa tulo ka sakyanan militar.

Ang posisyon nga gipundohan sa CAFGU nga si Ariel ug Ernie nga gipatay 15 metros sa kilid sa ikatulong krus, samtang ang namusil nag-umbaw sa walang bahin sa karsada, dinhi nakita ang mga basiyo sa bala sa namusil. Kini ang giposisyon sa tropa sa 9th SF Coy nga nianang panahona nag-road security para sa katawhan nga nagprosisyon. Samtang ang pwersa sa RMG-PNP nakaplastar mga 20 metros lang gikan sa krus sa walang bahin gihapon sa palugsong nga karsada.

Ang posisyon sa duha ka CAFGU nga gipatay nataliwad-an sa pwersa sa 9th SF Coy sa ibabaw nga bahin ug sa RMG-PNP sa ubos nga bahin.
Sa wala pa ang maong binuthanay, nakita sa mga nagprosisyon ang plastar sa pwersa sa 9th SF Coy ug CAFGU sa kilid sa karsada sa Iyao paingon sa Mahayahay. Nakita sa mga tawo nga naay pwersa sa militar sa matag istasyon sa krus.

Sa pagbuto-buto ang mibiya na ang kapin 3,000 nga katawhan nga nagprosisyon, tumoy na lang nga bahin sa prosisyon ang naa pa duol sa ikatulong krus dihang nagbuto-buto.

Namatikdan sa mga tawo nga naay naka-sibilyan (wala mag-unipormi) nga pulis ug militar. Sa wala pa ang unang hugna sa buto-buto, ang mga army mi-mando sa mga tawo nga mohapa, ug mihapa usab ang mga tao, dayon buto-buto na sa alas 5:15 sa buntag ug hangtud sa 7-8 sa buntag.

Ang maong binuthanay naggikan sa wala, taas nga bahin kung moatubang sa bukid sa Mahayahay; gibanabanang 100 meters kapin kon kulang gikan sa ikatulong istasyon sa krus. Namatikdan usab sa mga tawo, nga ang buto-buto 100 meters kapin kon kulang pasulod gikan sa daku nga krus sa 3rd station, mao kini ang posisyon sa militar ug pulis. Nabati sa mga nagprosisyon nga ang serye sa unang buto rapid fire, adiser ang tinagsa-tagsa ug dagkung buto sa lncher, ug walay balos nga mga buto.

Ang usa sa kaswalti sa buto-buto mao si Ariel Dawog Anduhuyan, 18 anyos, taga Sityo Tagkiling, Brgy. Anticala, bag-ong gradwar sa CAFGU, naigo sa ulo ug namatay. Ang ikaduhang kaswalti mao si Ernie Darasin, kapin 30 anyos, naigo sa tiyan ug namatay. Ang mga katawhan nga nagprosisyon, grabe ang nahiagomang saykolohikal, kalisang, samad ug garas sa ilang pagpaghapa, pagkamang ug dinaganay.

Namatikdan nga ang katapusang buto “let’s go” naghatag og signal nga ihunong na ang buto-buto, apan human sa buto-buto, ang mga pwersa sa PNP, CAFGU ug 9th SF Coy mi-cordon (miliyok dayon) sa dalan aron walay makaagi o makaduol nga mga tao sa nahitaboan.

Kung analisahon, ang motibo sa pagpamusil mao ang paghimo’g drama nga misakripisyo sa duha ka CAFGU (Ariel ug Ernie), aron dauton ang BHB pinaagi sa pagpasangil nga ang BHB maoy namusil atol sa kasaulogan sa kapin 3,000 nga katawhan panahon sa semana santa:

·Una, walay gideploy sa Front 21 bisan usa ka membro sa NPA sa maong lugar sa nahitaboan sa maong panahon;

·Ikaduha, ang mga gipusil nga CAFGU nataliwad-an sa pwersa sa army ug RMG; ug halos nalukop na ang erya sa mga nag-road security nga Army ug RMG, busa walay kahigayonan nga makasal-ot ang NPA;

·Ikatulo, ang mga basiyo sa bala nakit-an diha mismo sa giposisyonan sa 9th SF Coy nga nag-umbaw sa karsada nga nianang panahona nag-road security.

·Ikaupat, kining CAFGU nga si Ariel Dawog Anduhuyan ug CAFGU Ernie sumala sa army sa wala pa ang hitabo, dili kasaligang mga CAFGU. Kini si Ariel gipangita na sa ginikanan kay hangtud Marso 15 man lang ang iyang duty sa detatsment. Apan ang tubag sa detatsment nga tua gi-asayn sa laing kampo. Gibaniog usab nga patay na si Ariel apan walay lawas nga magpamatuod nga patay na kini. Kung mahinumdoman kini si Ariel ang naggiya sa operasyon sa 9th SF coy kun diin nabirahan sa duha ka higayon sa NPA snipers ang 9th SF Coy sayo pa ning bulana.

·Ikalima katingad-an nga gipahapa ang mga tao sa dayon nang buto-buto.

·Ika-unom dili batasan sa BHB nga maghimo’g “let’s go” nga pabuto kay magasto kini sa bala, ug nagadaginot ang BHB sa bala.

·Unsay nahimong papel sa mga nag-sinibilyan nga PNP ug army diha sa prosisyon?

Ang NPA hugot nga nagarespeto sa pagsaulog sa semana santa subay sa panawagan sa NDFP. Apan ang militar ug PNP naghimo og “drama” aron ipasangil sa NPA ang panghitabo nga minugna ra sa militar didto sa Zigzag, Sityo Iyao, Brgy. Anticala. Atol mismo sa tibuok kasaulogan sa semana santa, ang AFP padayung nagapahigayun og operasyong militar sa kabukiran sa Mt. Ilong-ilong nga miresulta sa daghang kaswalti sa mga kasundalohan ug sa drama nga enkwentro sa Zigzag.

Sa pikas bahin, halayo ra sa nahitaboan, lain pang insidente ang nahitabo, mga alas-8 sa Marso 29. Na-isnayp sa usa ka team sa NPA ang nag-operasyon nga platoon sa 9th SF Coy, nga misulod sa Mt. Ilong-ilong, sa ibabaw sa Brgy. San Antonio, RTR. Kini nga tropa sa militar naggikan sa Baryo sa San Antonio niadto pang Marso 24 sa gabii; usa ka sundalo sa 9th SF Coy ang patay.

*Marso 30.* Mokabat na sa 5 ka kolum sa 3rd SF Bn ang nag-operation palibot sa bukid sa Ilong-Ilong. Sa may alas 10:00 sa buntag, usa ka kolum sa nag-operasyon nga 9th SF Coy ang giatangan ug gibomba ginamit ang command-detonated explosive sa NPA sa bukid sa Ilong-Ilong duol sa ulohan sa Taguibo River, ug subay sa pasiunang report pinakaubos sa 6 ang kaswalti sa tropa sa army.

Subay sa maong panghitabo, kusganong giawhag namo nga diha-diha magtukod og usa ka independyente nga fact finding body aron tin-aw nga masusi ang maong panghitabo ug manubag ug mataral ang mga sad-an sa maong insidente, apil na ang ilang commanding officers. Dili mahimong matinud-anon ug katuohan ang imbestigasyon kung kini paga-apilan sa PNP ug Army kansang mga yunit nalambigit sa kontrobersyal nga panghitabo.

Gikinahanglan sab ang hinanaling tabang moral, pinansyal ug materyal ngadto sa mga pamilya sa biktima ug mga katawhan nga nahiagom sa saykolohikal ug pisikal nga kadaut bunga sa maong hitabo gikan mismo sa gobyerno isip indemnipikasyon ngadto sa mga biktima.


Authenticated by:
*Ka Oris*
Spokesperson
NDFP-Mindanao