Bag-ong CO sa 3rd SF PA igo lang nag-sorry sa nahimong kalapasan sa tawhanong katungod!

Logo.ndfp



March 09, 2013

Ang operasyong militar sa 3rd SF PA ug 402nd Brigade nagresulta na usab sa dislokasyon sa ekonomiya sa katawhan nga nanimuyo sa kabukiran sa Anticala, Butuan City, ilabina na sa tulo ka bukirong sityo sa Dogyaman, Sumoloy ug Patagon. Nagbakwit karon ang kapin 200 ka mga mag-uumang lumad sa Sityo Tagkiling, Anticala, Butuan City. Atubang sa maong kalapasan sa tawhanong katungod sayon ra kaayong nagsulti sa kahanginan si Col. Potenciano Camba ang commanding officer sa 3rd SF PA, og “sorry” sa gidangatan sa mga mag-uumang lumad. Igo lang diay mangayo og dispensa sa mga kalapasan sa tawhanong katungod nga ilang mahimo ngadto sa mga mag-uumang lumad sa kabukiran.


Mahinomdoman nga bag-o lang nagpuli og CO ang 3rd SF ug 402nd Brigade ug kini ang unang arangkada sa ilang military combat operation. Sa pagsugod pa lamang mga bakak na dayon ang gitagawtaw sa bag-ong commanding officer Col. Potenciano Camba tungod kay walay nakuha ang militar nga armas gikan sa mga Pulang manggugubat sa BHB sa kabukiran sa Anticala, Butuan City. Hinoon may nabilin nga gamay nga bag, may sulod nga usa ka parisan nga senina ug magasin sa pusil ang mga Kauban.

Niadtong Marso 1, 2013 dunay report sa usa ka gerilya platoon sa F21 BHB sa Butuan City, mga may usa ka grupo sa army nga misubida sa Sityo Tagkiling, Anticala gikan sa Brgy. Pianing, Butuan City. Mag-escort kuno ang maong grupo sa usa ka kandidato sa pagka-congressman nga si Atty. Lao Fortun nga kasamtangang vice-mayor sa maong syudad. Gikatingala kini sa maong gerilya platoon sa BHB F21 tungod kay dili pa man panahon sa pagpangampanya sa mga lokal nga kandidato. Ang miabot sa maong adlaw mao ang mga staff nga nangampanya ug wala si vice-mayor Fortun. Niini nga panghitabo angayang ipangutanan unsa ang kalambigitan sa vice mayor sa Butuan City sa operasyon militar sa kabukiran sa Anticala, Butuan City.

Sukad sa Marso 1, 2013 nagdaghan na ang mga army sa Tagkiling, Anticala, Butuan City. Niabot gani ang militar sa Kolambogan, Sibagat, Agusan del Sur. Ang Sityo Tagkiling mga duha ka kilometro ang gilay-on gikan sa baryo sa Kolambogan ug didto nanukad ang tropa sa 3rd SF PA sa pag-atake sa biniyaan nga temporaryong kampo sa BHB-F21. Matod sa report sa usa sa mga lider sa BHB-F21 sa Butuan City, ang gi-atake sa mga army mao ang bukid nga ilang gipondohan panahon sa pagsaulog sa Ika-44 nga anibersaryo sa Partido Komunista sa Pilipinas niadtong Disyembre 26, 2012 diin may mokabat sa 200 nga mga bisita. Walay nahitabo nga pinusilay sa pag-abot sa 3rd SF PA sa lugar kay biniyaan na man lagi kini nga kampo sa BHB. Modistansya sa duha ka kilometro gikan sa Sityo Patagon ang biniyaang kampo.

Gipondohan na dayon sa militar ang biniyaang kampo sa BHB. Gi-okupa ug giposisyonan na usab sa militar ang Sityo Dogyaman, Patagon ug Sumoloy ug kini ang dakung hinungdan sa temporaryong pagbiya sa mga mag-uumang lumad gikan sa ilang pinuy-anan ug gipanginabuhian. Sa ingon niini nga kahimtang ang 3rd SF PA ang hinungdan sa dakung dislokasyon sa mga mag-uumang lumad sa maong mga sityo.

Tungod kay teritoryo man sa BHB ang gisulong sa militar maglunsad gyud kini og mga kontra-atake. Gikan sa Enero 15, 2013 miabot na sa 16 ka taktikal nga opensiba ang nalunsad sa BHB sa tibuok NEMR batok sa mga operasyon militar sa AFP/PNP. Nia ang listahan sa mga kontra-atake sa mga gerilyang platoon sa BHB sa NEMR sa bulan lamang sa Marso 2013.
  1. Marso 3, 2013. Naharass/isnayp ang pwersa sa 36th IB PA didto sa bukid nga ginganlan og Lomoton sa Sityo Gakub, Hinapoyan, Carmen, Surigao del Sur sa 5:30 sa hapon. Walay gikareport nga kaswalti sa kaaway ug sa BHB sa Front 30 sa Surigao del Sur.
  2. Marso 5, 2013. Gibalikan sa mga Pulang manggugubat ang bukid sa Lomoton ug nangharass/isnayp kini sa may alas 10:30 sa buntag. Dili pa klaro ang report nga dunay samdon ang kaaway ug walay samdon sa BHB.
  3. Marso 5, 2013. Naigo sa haras/isnayp sa BHB Front 19 sa Surigao del Sur ug nasamdan ang usa ka PO1 Ronald Palma sa PNP didto sa Km.7, Aras-asan, Cagwait sa may 12:30 sa udto samtang naglunsad sa operasyon militar sa erya sa BHB.
  4. Marso 6, 2013. Kaduha naharass/isnayp ang pwersa sa 3rd SF PA didto sa Sityo Patagon, Anticala, Butuan City. Duha ang samdaon sa kaaway. Ang harassment nahitabo sa gi-okupa sa kaaway nga biniyaang temporaryong kampo sa BHB. Libreng naka-atras ang mga Pulang manggugubat nga walay kaswalti.
  5. Marso 6, 2013. Naharass sa mga Pulang mangugubat sa Front 16 ang pwersa sa 30th IB PA didto sa Villariza, Malimono, Surigao del Norte sa may alas 7:00 sa gabii. Duha ang patay sa kaaway nga nakita sa mga baryohanon. Walay kaswalti sa bahin sa BHB.
  6. Marso 7, 2013. Gibalikan sa mga Pulang manggubat ang gi-okupa sa 3rd SF nga biniyaang temporaryong kampo sa BHB didto sa may Sityo Patagon, Anticala. Kaduha na usab kini naigo sa maong adlaw, una sa may 12:23 sa kaudtohon ug ang ikaduha sa may alas 5:35 sa hapon. Usa ka army ang naigo-patay.
Ang subsob nga mga operasyong militar dili makapuo sa Bagong Hukbong Bayan. Ang kaluha niini nga pagpanglapas sa tawhanong katungod sa mga nanimuyo sa kabukiran mas makapasamot pa sa kasuko sa katawhan batok sa mangtas nga militar. Sa kanunay andam ang mga Pulang manggugubat sa Bagong Hukbong Bayan sa NEMR sa pag-atubang sa kaaway aron panalipdan ang katawhan.