Dole Phils nasilotan taliwala sa mga operasyon militar sa AFP

Maria Malaya
NDFP Northeast Mindanao Chapter 


February 21, 2013

Ang sustinidong operisyong militar sa AFP wala makapugong sa mga gerilya platun sa BHB sa NEMR sa paglunsad sa iyang mga aksyon militar. Taliwala sa walay hunong nga presensya sa reaksyunaryong kasundaluhan malampuson gihapon ang BHB sa pagsilot sa multinasyunal nga kompanyang Dole Philippines sa Tago, Surigao del Sur.

Entrada pa lang sa tuig 2013 miarangkada na ang mga sustinidong operisyong militar sa AFP/PNP nga nagtumong nga puohon gyud ang BHB karong tuiga. Niadtong petsa 15 sa Enero ang 36th IB PA uban sa 4th SRC sa Army, anaa sa kabukiran sa Tandag, San Miguel, Carmen ug Lanuza sa Surigao del Sur aron paggukod sa mga platun gerilya sa BHB sa maong lugar. Samtang sa ubang bahin sa Surigao del Sur ug Agusan del Sur nga eryang langkob sa 29th IB PA, dunay gilunsad nga operisyong sibil-militar nga _community organizing for peace and development_ (COPD). Nagtumong kini sa pagguba sa rebolusyonaryong kahiusahan sa katawhan sa kabaryohan. Gigamit nila ang pagpanglingla ug pagpanghadlok aron mapugos sa pagsurender ang mga lumolopyo. Ang 30th IB PA sa Surigao del Norte ug ang 3rd SF BN PA sa Agusan del Norte walay puas sa ilang mga operisyong militar ug mga COPD.



Niadtong petsa 15 sa Enero ning tuiga, nagsugod usab ang sustinidong operisyong militar sa 13 ka baryo nga langkob sa mga _boundary_ sa mga lungsod sa Tandag, San Miguel, Carmen ug Lanuza, Surigao del Sur. Kini nga mga kabukiran ang partikular nga giatake sa mga tropa sa 36th IB PA, 4th SRC PA, piniling tropa sa 29th IB PA ug 58th IB PA. Hangtud niining pagsulat anaa pa ang mga tropa sa 36th IB PA sa kabukiran. Mokabat na sa 37 ka adlaw ang maong operasyon militar. Ikaupat na ka hugna ang pagpulipuli nila sa mga tropa.



Taliwala niini, wala makapugong ang mersenaryong kasundalohan sa mapadayonong pagsilot sa rebolusyonaryong kalihukan sa plantasyon sa saging sa Dole Phils nga anaa sa Tago, Surigao del Sur. Ug walay hunong pa nga ilunsad sa mga platun sa BHB ang pagsilot sa maong plantasyon hangtud nga dili kini hingpit maguba ug moundang. Wala kinahanglana sa katawhan sa Caraga ang mga plantasyon sa saging ug uban pang mga plantasyon nga nagtanom sa pang-export nga mga produkto. Pagpalambo ug mahukmanong suporta alang sa produksyon sa pagkaon diha sa mga basakan ug maisan ang gikinakanglan sa mag-uuma.

Niadtong Enero 19, 2013, gitapas/gilampas ang 9 ka ektaryang saging ug giguba ang usa ka _tractor_ ug 4 ka _backhoe_ didto sa Anahao Daan, Tago, Surigao del Sur.

Niadtong Pebrero 1, 2013 giguba na usab sa usa ka grupo sa BHB sa Surigao del Sur ang usa ka _container van_ nga nagkarga sa saging sa Dole Phils. Didto kini nahitabo sa haywey sa barangay Salvacion, San Agustin, Surigao del Sur samtang nagbyahi padulong sa Butuan City aron itumod ngadto sa laing nasud ang ilang saging.

Ang duha ka bag-ong hitabo nga pagsilot sa Dole Phils sa Tago, magsilbing balik-mensahe ngadto sa tanan mga kontraktor sa Dole Phils dinhi sa NEMR ug sa uban pang mga plantasyon sa pang-exsport nga produkto. Samtang sayo pa mobiya na kamo sa inyong kontrata, ayaw na ninyo hulata nga maigo na usab kamo. Dili ug dili mohunong ang mga pwersa sa BHB sa pagsilot niining maong mga plantasyon nga nangilog sa kayutaan ug naggamit sa daghang kemikal nga makadaut sa katawhan ug makaguba sa kinaiyahan.

Niadtong Pebrero 2, 2013 gipahigayon sa mga PuMa ang usa ka harasment didto sa Sityo Kadlum, Cabangahan, Tago, Surigao del Sur batok sa nag-uban nga 36th ug 29th IB PA. Namatay ang usa ka CAA nga ginganlang Michael Joy Sanchez nga taga-Ganayon, Lianga, Surigao del Sur.

Niadtong Pebrero 19, 2013 sa may alas 7:30 sa buntag, nadis-armahan nga walay buto sa laing grupo sa BHB sa Surigao del Sur ang usa ka sibilyan nga gigamit ang iyang armalyt sa pagpanghasi sa iyang mga silingan ug pagpamugos sa pagpamalit sa yuta. Nakuha gikan kaniya ang usa ka M16 armalyt, usa ka shotgun, usa ka 22 kalibre nga sniper nga armas ug usa ka pistola nga 9mm. Didto kini nahitabo sa Km. 3 sa Puyat, Carmen, Surigao del Sur. Ang Brgy. Puyat mao ang usa sa mga agianan sa mga tropa sa militar nga naglunsad sa operasyon sa kabukiran.

Sa samang adlaw sa kaudtohan, nagka-engkwentro ang usa ka platun sa BHB sa Surigao del Sur ug usa ka kolum sa 36th IB PA didto sa Sityo Poog, Maitom, Tandag, Surigao del Sur. Matod sa pasiunang report, mikabat sa duha ka oras ang sinukliay sa bala ug luwas nga naka-atras ang mga Pulang Manggugubat nga maisogong misukol sa militar.

Sulod niining sobra bulan na nga operasyon militar miabot na sa 16 taktikal nga opensiba ang nalunsad sa mga platun gerilya sa BHB. Nagresulta kini sa pagkamatay sa 2 ug pagkasamad sa 6 sa bahin sa kaaway samtang walay kaswalti sa bahin sa BHB. Tungod kay kaluha sa operisyong militar ang pagpanglapas sa tawhanong katungod padayon nga gisubay ug gisusi ang mga gikatahong mga kalapasan.

Bisan unsa kasubsob, kamangtas ug kamalinglahon ang mga operisyong militar ubos sa Oplan Bayanihan sa rehimeng Aquino, andam kanunay ang ang Bagong Hukbong Bayan sa pag-atubang niini aron panalipdan ang interes sa katawhan! Dili na kapugngan ang pagkusog nga rebolusyonaryong kalihukan sa NEMR ug sa tibuok kapupud-an!

*Mabuhi ang Bagong Hukbong Bayan!
Ipaasdang ang gubat sa katawhan hangtud sa kadaugan!*