Pagpangharas sa DSWD Workers sa San Fernando, Binuhatan sa Bandido

Ka. Ariel “Inda” Magbanwag
NPA-South Central Bukidnon Sub-regional Command
Abril 19, 2013

Padayon ang pagpanghasi sa mga bandidong suportado sa militar sa San Fernando, Bukidnon. Taliwala sa lapad nga pagkabutyag sa ilang mga teroristang binuhatan, ug mga kaso sa reaksyunaryong hukmanan nga ilang giatubang, gawasnon gihapon nga nagabahas-bahas ang tulisan nga pundok ni Nonong ug Butsoy Salusad nga walay tulubagon. Walay pili ug walay pagpanagana nga gipabuto-butohan sa membro sa bandidong grupong TRIOM nga nagpakaaron-ingnong NPA nga si Rebong ang mga field workers sa 4P’s ilalom sa DSWD nga naasayn sa San Fernando, Bukidnon niadtong Marso, 2013 samtang nagpadulong sila sa ilang Family Development Session sa Brgy. Mabuhay sa maong lungsod.



Hugot nga gipanghimaraut sa New People’s Army - South Central Bukidnon Subregional Command ang maong garapal nga bandidong binuhatan ni Rebong. Aktibo ang grupo ni Rebong sa pagpangilkil sa katawhan sa Halapitan, San Fernando. Ginakolektahan nila og tag P500 ang matag benipisyaryo sa 4Ps. Tungod kay armado ang ilang grupo, walay bisan usa sa mga residente nga nangahas pagreklamo kanila. Ug kay mga tawo sila ni Nonong Salusad, mismo ang mga kasundalohan walay ginahimo aron mapakgang ang pagpangilkil ug pagpanghasi sa maong grupo.

Publikong kasayuran na nga sama sa mga Salusad, ginalam sa mersenaryong kasundalohan si Rebong. Kung kahinumduman, usa si Rebong sa 19 ka mga peke nga NPA surrenderees nga giparada sa 8th IB niadtong Marso 2012. Human nila gihimong gatasan ang Balik-Baril Program kakunsabo ang kadagkuan sa militar, gipatraining dayon siya og CAFGU uban sa panon ni Nonong Salusad.

Ang seguridad sa mga empleyado sa DSWD nga nagadumala sa 4Ps nag-unang responsibilidad sa reaksyunaryong gubyerno. Angay nga iseguro kini sa mga kapulisan ug lokal nga gobyerno sa San Fernando. Busa, gihagit namo ang kapulisan ug kasundalohan, nga kung tinuod nga walay silay kalambigitan sa mga binuhatan sa maong bandidong grupo, ilang sikopon gilayon si Rebong, lakip na si Butsoy ug Nonong Salusad nga hagbay ra nga nagahasi sa katawhan sa San Fernando.

Sa among kabahin, ikapasalig namo nga luwas ang mga DSWD workers ug bisan kinsang sibilyan nga kawani nga mosulod sa mga natarang gerilya basta dili nila gamiton ang 4Ps diha sa pagpaniktik ug pagbabag sa mga rebolusyonaryong kalihukan sa erya. Bisan tuod nga giila sa rebolusyonaryong kalihukan ang pagkainutil sa maong panglimos nga programa ni Aquino sa 4Ps aron sulbaron ang mga batakang problema sa katawhan, apan subay sa lagda sa gubat, dili target sa NPA ang mga empleyado nga nagapatuman sa maong programa.