27 Sundalo Patay sa Laing Hugna sa mga Pag-atake sa NPA

Allan Juanito
NPA-North Central Mindanao Regional Command
Mayo 19, 2013

Subsob nga mga aksyong militar ang gitubag sa New People’s Army- North Central Mindanao Regional Command batok sa mga laraw sa 4th Infantry Division ug pagdugang sa Marine Battalion Landing Team-3 sa rehiyon human gipanganti sa rehimeng US-Aquino ang pagbungkag sa nagatubo nga rebolusyonaryong kalihukan dinhi. Sa laing hugna sa mga pag-atake sa NPA, 27 ang patay sa mga sundalo ug daghang ang mga samaron.



Ang musunod mao ang detalye sa mga aksyong militar gikan Mayo 3 hangtod Mayo 11, 2013:

Mayo 3- nakasinukliay og bala ang usa ka tim sa mga Pulang manggugubat isip kontra ambush batok sa usa ka kolum sa 8th IB ug Scout Rangers-AFP didto sa Brgy. Busdi, Malaybalay City, Bukidnon. Usa ang natahong patay sa kaaway ug laing 7 pa ang samaron. Sa pikas bahin, luwas nga nakawithdraw ang mga kauban gawas sa usa nga mabayanihong naghalad sa iyang kinabuhi.

Mayo 4- usa ka aksyong harassment ang gilunsad batok sa yunit sa Scout Rangers nga nag-strike operation sakay sa 12 ka motor gikan sa highway padulong sa Barangay Mahagsay, San Luis, Agusan del Sur. Tulo ka kaaway ang napatay sa maong panghitabo.

Mayo 5- dugang harassment na usab ang nahitabo sa Brgy. Mahagsay, San Luis, Agusan del Sur nga mikalas sa kinabuhi sa laing usa ka sundalo.

Mayo 7- Sa Brgy. Salawagan, Quezon, Bukidnon, giharass sa laing yunit sa NPA ang usa ka command post sa 8th IB-AFP kung asa pito sa mga sundalo ang napatay.

Mayo 8- Nagmontar og checkpoint ang yunit sa NPA sa Brgy. Basak, Lantapan, Bukidnon.

Mayo 8- nagcheckpoint usab ang usa ka yunit sa NPA sa Brgy. Can-ayan,
Malaybalay City taliwala sa kaduol niini sa usa ka detachment sa kaaway sa
maong barangay ug mismo sa kampo sa 403rd Brigade sa sentrong syudad.

Mayo 9- aksyong harassment ang gilunsad sa Brgy. Samay, Gingoog City batok sa joint operation sa 58th IB ug mga Marines. Dinhi, usa ka kaaway ang patay.

Mayo 9- dugang harassment ang gipahamtang sa Brgy. Samay, Gingoog City kung asa napatyan og laing duha ang kaaway.

Mayo 9- sa Quezon, Balingasag, Misamis Oriental, giharas sa laing yunit sa NPA ang mga sundalo sa 58th IB.

Mayo 9- nakalunsad og harassment batok sa usa ka yunit sa 8th IB didto sa Sityo Sabangahan, Brgy. San Luis, Malitbog, Bukidnon.

Mayo 10- giharass sa usa ka yunit sa NPA ang detachment sa CAA-AFP sa Km. 11, Tapnigue, Sangay, Buenavista, Agusan del Norte. Gikataho nga duha ka kaaway ang napatay sa maong panghitabo.

Mayo 11- giharass sa mga kauban ang mga sundalo sa 58th IB ug Marines nga nagsakay sa unom ka siksbay truck didto sa Brgy. Lawit, Gingoog City. Dinhi, 10 ka mga kaaway ang napatay samtang usa ka kauban ang namartir sa maong pag-atake.

Sa pag-atras sa reaksyunaryong gubyerno sa panaghisgot kalinaw ug sa pagpaling niini sa militaristang pamaagi sa pagsulbad sa gubat sibil sa nasud, samot nga nahimong pursigido ang rebolusyonaryong kalihukan dinhi sa rehiyon nga ipasubsob ang taktikal nga opensiba padulong sa musunod nga yugto sa estratehikong panagpatas ug tukuron sa hingpit ang tinuod nga gubyerno sa katawhan isip bugtong pamaagi sa tiunay nga pagsulbad sa sosyo-ekonomiko ug pulitikanhong gamot  sa kawalay makiangayon ug malungtarong kalinaw.