Gidakop, dayon gibuhian ang PNP-TMG sa 1st PBB-NPA

Simon Santiago, Regional Political Director
NPA-Southern Mindanao Regional Command
Mayo 13, 2013

Pito ka myembro sa Police Regional Office (PRO)-XI Traffic Management Group ang gidakop sa 1st Pulang Bagani Battalion-New People's Army (NPA), *Mayo*11, 2013 @ 4pm didto sa Brgy. Paquibato, Davao City, tungod sa paglapas sa rebolusyonaryong palisiya sa eleksyon.

Ang 7 nga mao silang Edgardo Butad, Erald James M. Cajeras Sr., Vincent M. Dela Torre, Abdul Azis A. Ali Jr., Ariel Carbule, Edmond O. Trenidad ug Rusalito C. Caranguit giagi sa imbestigasyon,edukasyon ug hugot nga pagpanghimangno sulod sa hapit usa ka oras, ayha sila gibuhian.



Gidakop sila sa NPA tungod kay napakyas sila sa pag-alayon ug pagtuman sa mga lagda sa rebolusyonaryong gobyerno sa katawhan sa ilang pagsulod sa rebolusyonaryong base. Sila usab nahimong escort sa brgy kapitan nga nagdala og kwarta sa pulitiko aron ipamalit og boto.

Upat ka brgy. kapitan sa Paquibato district ang bag-ohay nisurender sa NPA kabahin sa kwarta nga ilang nadawat gikan kang Congresswoman Mylene Garcia sa Davao City. Sa Brgy. Mapula, 27 ka sobre ang nakit-ang may sulod nga P300; sa Brgy. Lumiad P15,000; sa Brgy. Paquibato P20,000 ug sa Brgy. Panalum, P15,000.

Daan nang hugot nagpahimangno ang NPA sa mga pulitiko nga ipatuman ang mga rebolusyonaryong palisiya kabahin sa eleksyon sama sa pagbawal sa pagpanghulga ug pagpamalit og boto.

Ang mga lakang ug aksyon nga gipatuman sa NPA sa nakalapas sa palisiya sa eleksyon sulod sa rebolusyonaryong base mao ang pagkumpiska sa mga pusil sa kandidato, pag-aresto sa mga armadong police escort ug sa mga namalit og boto, pagkumpiska sa mga bugas, wala pagpasulod sa area, pagpatawag sa mga pulitiko tungod sa non-compliance status ug uban pa.

Kining maong mga lakang sa NPA nagpakita sa rebolusyonaryong awtoridad niini ug naghukas sa pagkahugaw ug pagkabangkarote sa eleksyon sa reaksyonaryong estado nga gidominahan sa mga tradisyonal nga mga pulitiko sa mga nagharing hut-ong.

Bisan kinsa man ang mudaug sa reaksyonaryong eleksyon, walay pundamental nga kabag-ohan ang makab-ot sa pangandoy sa katawhan para malingkawas sa tumang kakabus. Magpabilin nga ang rebolusyon ug gubat sa katawhan mao ang makahatag katumanan sa katawhan.