Giisnayp sa NPA, 2 patay sa 8th IB samtang gipahigayon ang relis sa POW sa North Cotabato

Isabel Fermiza
Mt. Apo Sub-regional Command--NPA Southern Mindanao
8 Mayo 2013

Napahigayon na ang relis sa  Mt. Apo Sub regional Command sa New People's Army ang bihag sa gubat nga si PNP PO3 Maula Tato Ali nga taga-Arakan police station 2:30 pm Mayo 8, 2013 sa Brgy Cabalantian, Arakan, North Cotabato. Samtang pahumanay na ang programa, pagka-alas tres, napugos ang usa ka tim sa Pulang Manggubat nga isnaypon ang usa ka squad column sa 8th Infantry Batallion sa sitio Malinao, Brgy. Bato, Kitaotao, Bukidnon nga 10 kilometros ang gilay-on sa girelisan ni Ali. Duha ka sundalo sa 8th IB ang patay sa maong pag-isnayp.


Ang pag-insayp hinanaling desisyon sa NPA aron panalipdan ang kaugalingon luyo sa maniobra sa 10th Infantry Division ug 4th Infantry Division sa  AFP nga buot guboton ang hapsay ug malinawong pagpagula sa bihag sa NPA, 29 ka adlaw human kini gidakop niadtong Abril 19.

Bakakon ug walay respetong gipatuo ni CMO Commander Lt. Sema sa 57th IB ang katawhan ug pamilya ni POW Ali nga adunay Suspension of Military Operations (SOMO). Sa pagkatinuod, nag-operisyon ang mga sundalo sa Brgy. Binay ngadto sa Brgy. Noa, sa Magpet. Pagka-3:30 sa hapon nakit-an ang mga sundalo sa sitio Minarok, Cabalantian 5 ka kilometro gikan sa  release site.  Ang maong mga sundalo naggikan sa ilang detachment sa  Brgy. Anapolon diin sakop sa giingong SOMO.

Taliwala sa tataw nga pagsabotahe sa mga pasistang sundalo, napahigayon ang pagrelis sa bihag sa gubat, isip tubag sa NPA ug sa National Democratic Front  sa hangyo sa mga peace advocates, higala ug pamilya sa bihag sa gubat, ug isip pagtamod niini sa mga lagda sa international humanitarian law.

Gidawat ang bihag sa gubat nga si Ali sa representante sa ICRC, ni Fr. Paul Paracha sa Sowing the Seeds, Provincial Board Member Aying Pagal, Arakan Mayor Robino, Pres. Roxas Vice Mayor Mallorca, mga pastor, ug pipila ka mga higala. Gidawat sab si Ali sa iyang pamilya nga naghulat sa Bishop's Palace.

Magpadayong ipatuman sa NPA ang aktibong pagpanalipod sa tawhanong katungod sa katawhan ug pagtuman sa lagda sa gubat, atubangan sa malupigon ug malinglahong operisyong militar ilalom sa Oplan Bayanihan sa rehimeng US-Aquino.