Mga Sibilyan Giaresto sa AFP, PNP sa Guingona nga Kaso

Cesar Renerio
NDFP-NCMR
August 14, 2013

Gipanghimaraot sa National Democratic Front-North Central Mindanao Region ang AFP ug PNP sa pag-aresto ug pagdetener niini sa duha ka inosenteng sibilyan nga gipasanginlan sa nahitabong sinukliay og bala tali sa New People’s Army ug mga armadong escort ni former Mayor Ruthie Guingona sa Gingoog City niadtong April 20, 2013.

Gipanghinambog sa medya sa tigpamaba sa Regional PNP nga si Police Supt. Ronnie Francis Carriaga ang pagkasikop ni Mr. Reynaldo Agcopra Gundaya niadtong Sabado, Agosto 10 didto sa San Roque, Aposkahoy, Claveria, Misamis Oriental. Gipaila siya isip si “Kumander Tarik” nga utok sa natigayong pinusilay sa gimontar nga NPA checkpoint niadtong Abril 20.

Gipatuman ang pag-aresto sa hiniusang operasyon sa PNP Regional Intelligence Unit, Regional Special Operations Group, CIDG, Provincial PNP ug Military Intelligence Battalion sa 4ID pinasikad sa warrant of arrest nga gi-isyu  ni Judge Mirabeaus Undalok sa Branch 43, Regional Trial Court sa Gingoog City.

Usa lang si Gundaya sa 27 ka mga indibidwal nga gikasuhan sa double murder ug multiple frustrated murder sa hitabo niadtong Abril 20. Laing sibilyan nga si Dodo Bernas nga gipaila nga si Kumander Dindo ang gidakop niadtong Hulyo 13 sa Sityo Lincomonan, Binacalan.

Sumala sa pagsaysay sa iyang asawa nga si Mrs. Dolores Bernas, mga alas onse sa gabii dihang gisikaran ug giguba sa 15 ngadto sa 20 ka mga armadong tawo ang ilang pultahan. Nailhan niya si Cocoy Pajamutan nga usa sa mga armado nga nani-on sa ilang tibuok banay gamit ang taas nga kalibreng mga armas. Lakip ang mga bata sa gitionan ug gipahurar ang duha ka kamot. Dayun, pugos nga gipakuyog sa mga armado ang iyang bana, giguyod ug gipasakay sa van nga gigamit sa grupo. Composite team sa PNP ug AFP ang nag-aresto.

Hugot nga gipanghimakak sa NDF-NCMR nga mga NPA ang duha ka dinakpan nga silang Dodo  Bernas ug Reynaldo Gundaya. Busa, dili makatarunganon ang pagpasangil ug pagpapanubag kanila sa maong mga kaso.  Paglapas kini sa ilang tawhanong katungod.

Sama sa hitabo sa pagpang-aresto ug pagdetener sa mga sibilyan sa San Luis, Agusan del Sur ug sa San Fernando, Bukidnon, kining ulahing pag-aresto ug pagpasaka og kaso sa mga mag-uuma sa Gingoog, mga pagpamatuod sa kainutil sa PNP ug AFP sa paggukod sa mga NPA taliwala sa walay puas nga dinagkong mga operasyong militar sa sidlakang bahin sa Misamis Oriental.  Sa ilang kapakyas, kanunay na lang nilang gipahimungtan ang mga sibilyan aron duna silay ikapasundayag nga pagtuman sa ilang mga katungdanan ngadto sa mga magbubuhis nga nagsweldo kanila ug labaw sa tanan sa ilang mga amo.  Dili na ikapangutana kung nganong walay hunong usab nga nagasaka ang talaan sa ilang mga pagpanglapas sa tawhanong katungod.

Samtang matinud-anong giangkon sa NPA ang tulubagon sa subo nga panghitabo kang Mayor Guingona ug sa pagpahamtang sa tukmang pang-organisasyong lakang ngadto sa mga hingtungdan, gikasubo namo ang pagkaangin sa mga mag-uuma niini nga kaso.  Ang tanang mga kalapasan sa mga rebolusyonaryong balaud, sinserong atubangon sa mga hingtungdan sa gambalay sa mga rebolusyonaryong lagda ug mga palisiya, dili atubangan sa reaksyonaryong hukmanan sa nagharing hut-ong nga dili malaumang makahatag sa tinuod nga hustisya.

Lambigit niini, gihangyo namo ang mga pamilya sa mga hingtungdan sa maisugong pagbarug ug pagpanghingusog sa ilang katungod batok niining dakung inhustisya kanila.  Giawhag usab namo ang tanang mga indibidwal, grupo, ug mga organisasyon nga nagabarug sa tinuod hustisya sa pagtunol sa suporta ug legal nga tabang sa mga biktima diha sa ilang pakigbisog batok sa pagpanglapas sa tawhanong katungod ug diha sa hawanan sa reaksyonaryong korte.