Detachment sa Lantad, Balingasag, Misamis Oriental, gireyd sa NPA, 12 ka armas nasakmit!

Allan Juanito
NPA- North Central Mindanao Regional Command
Setyembre 23, 2013

Malampuson nga nareyd sa New People’s Army- Eastern Misamis Oriental- Northeastern Bukidnon Subregional Command ang CAA-Army Detachment sa Sitio Lantad, Brgy. Kibanban, Balingasag, Misamis Oriental, Setyembre 22, 2013 mga bandang ala 1:00-3:00 sa kaadlawon. Nasakmit sa pag-atake ang 12 ka haypawer nga armas ug uban pang kahimanang militar. Sa maong pag-atake, lima ang patay ug laing upat pa ang nasamdan sa tampi sa pasistang tropa. Sa pikas bahin, walay kaswalidad nga nahiagoman ang panig sa NPA.

Bunga sa tukma nga paniktik ug suporta sa mga masa, namaksimisa sa mga kauban ang bulhang nga bahin sa detachment kung asa walay nagbantay. Surpresa nga nasulod sa assaulting unit sa NPA ang kinural nga detachment ug ang mga nakalitang Cafgu ug regular nga sundalo walay nahimo gawas sa paghapa. Apan dunay pipila kanila ang nakasukol busa nahigayon ang sinukliay og bala.

Nagresulta ang pinusilay sa lima ka patay nga naglangkob sa upat ka Cafgu ug usa ka sundalo. Naila ang nakalas nga cadre man nga si Sgt. Laong ug ang mga Cafgu nga silang Ali Saguiway, Nino Lugar, Dodo Bacus ug Jonnel Tandayon. Hisamdan ang laing tulo pa ka Cafgu ug si Corporal Baluyot nga nagsilbing assistant cadre man.

Nakontrol sa may gidak-ong kumpanya nga Pulang manggugubat ang maong detachment. Gigapos ang tulo ka cafgu nga wala nagpakita og pagsukol. Pagkahayag na, gipalihok sa mga kauban ang mga sibilyang lumulupyo sa duol arun matabangan ug mapadala sa pinakaduol nga hospital ang mga nasamdan.

Sa wala pa miwithdraw, gipahigayon sa nag-atakeng yunit sa NPA ang usa ka mass meeting sa mga residente sa Sityo Lantad. Sa taas na nga panahon, ang detachment nagakontrol sa gawasnong panginabuhi sa mga lumulupyo. Ang maong detachment gihimong kasangkapan sab sa mga claimants sa CADT nga gipaluyuhan sa mga langyaw ug lokal nga nagharing hut-ong alang sa operasyon sa mina ug uban pang anti-katawhang proyekto nga nagalapas sa katungod sa mga lumad sa ilang yutang kabilin.

Paglapas sa balaod sa gubat ang pagtukod sa detachment nga 400 metros ra ang gilay-on gikan sa pinuy-anan sa mga sibilyan. Pasarpasar ug tagdugay sab ang sweldo sa mga cafgu nga kasagarang muabot og tag tulo ka bulan ayha nila madawat.

Ang maong malampuson nga pag-atake napahigayon bisan wala pa nauga ang laway sa tigpamaba sa 4th ID kabahin sa ilang gipakanaug nga “full alert status” atol sa nagpadayong kagubot sa Zamboanga, ug nga nagkahuyang na ang NPA ubos sa eryang langkob niini.  Bisan dinhi sa rehiyon sa North Central Mindanao, nagkapuliki ang kasundaluhan sa nagkadaiyang mga pag-atake sa NPA. Pamatuod kini sa padayong pagkusog sa rebolusyonaryong kalihukan ug sa lalom nga paggamot niini sa katawhang dinaugdaug ug pinahimuslan.