Pag-release kang Cpl. Salman Abas – POW sa NPA sa Agusan del Sur

Ka Cesar Renerio
NDF-North Central Mindanao Region
Setyembre 22, 2013

Ubos sa pagmando ug pagpadangat sa order of release sa National Democratic Front- North Central Mindanao Region, gipahigayon karong adlawa ang pagrelease kang Corporal Abas.   Niadtong Agosto 8, 2013, naaresto  si Corporal Abas sa Km.25, Side-2, Mahayahay, San Luis, Agusan del Sur sa gimontar nga NPA checkpoint samtang nagpadulong sa detachment sa Binicalan kung asa nag-duty siya isip assistant cadreman ni Benhur Mansulonay.  Gihuptan siya sa usa ka yunit sa New People’s Army sa Front 88 isip prisoner of war sulod sa kapin usa ka bulan.

Ang pag-release kang Corporal Abas sa alas 9:45 sa buntag sa lungsod sa San Luis, Agusan del Sur gihimo human siya gipailalum sa imbestigasyon ug napamatud-ang walay krimen batok sa katawhan ug sa rebolusyonaryong kalihukan sa hukumang bayan.   Subay sa medikal nga eksaminasyon nga gihimo sa  medic sa NPA sa wala pa ang release, anaa siya sa maayong kahimtang sa panglawas ug panghunahuna.

Gipatuman sa custodial unit sa New People's Army ilalom sa Western Agusan Norte-Agusan Sur Subregional Command ang pormal nga pag-release kaniya ngadto sa mga representante sa local government unit sa San Luis ug sa probinsya sa Agusan del Sur, mga representante sa relihiyosong pundok ug lokal nga media.

Gipahalipayan  sa NDF-NCMR ang New People's Army-WANAS Subregional Command sa ilang hugot nga pagsubay sa balaud sa gubat diha sa maayong pagtratar kang Corporal Salman Abas samtang anaa sa ilang mga kamot. ###