Duha ka sundalo sa 58th IB, patay sa engkwentro sa Claveria, Misamis Oriental

Lorena Mangahas
New People’s Army - EMONEB Subregional Command
Oktubre 26, 2013

Patay ang duha ka elemento sa 58th IB-Philippine Army human ang pinakaulahing harassment operation sa New People’s Army ubos sa Eastern Misamis Oriental-North Eastern Bukidnon (NPA-EMONEB) Sub-regional Command batok sa nag-operasyong tropa sa reaksyunaryong kasundaluhan sa Sitio Dalao-ay, Minalwang, Claveria, Misamis Oriental niadtong Oktubre 25, 2013, mga bandang alas 11:00 sa buntag. 

Nagbaklay ang usa ka kolum sa AFP dihang gibirahan sa usa ka tim sa mga Pulang manggugubat sulod lang sa gilay-ong 15 metros. Sa pikas bahin, luwas ug walay tatsa nga nakaatras ang mga kaubanan taliwala sa pagpaulan og bala sa reaksyunaryong kasundaluhan.

Sa kapakyas paggukod sa mga yunit sa NPA nga miatake sa detatsment sa Lantad nga gisundan sa serye sa mga aksyong harasment batok sa nag-hot pursuit nga tropa, mga sibilyan na usab ang gipahimungtan sa 58th IB. Gireklamo sa 13 ka mga sibilyan sa tulo ka baryo sa Lagonglong, Misamis Oriental ang pasistang pagpanghasi kanila sa maong tropa sa pagduda nga sila mga tigsuporta sa NPA. 

Niadtong Oktubre 23, mga alas 7:00 sa buntag, gisulod sa duha ka naka-bonnet nga mga lalaki ang balay ni Rosalia Lutawan ug sa buta ug bakol niini nga anak nga si Rosalie sa Brgy. Umagos, Lagonglong. Gibaharan nga pamatyon sila kung dili mokooperar sa reaksyunaryong gobyerno. Si Rosalia mao ang balo, tigulang ug masakiton nga inahan ni “Ka Jerboy” nga namartir sa pakigpinusilay sa mga armadong escort ni Ruthie Guingona sa Capitulangan, Gingoog City niadtong Abril. Sa dayong paglakaw sa duha, nagbilin pa og sulat-bahad nga pinirmahan sa usa ka Capt. Lorifi Hernandez ug may gisukip nga contact number nga 09266928128 ug 09184443190.

Nakasinati usab sa susamang pagpanghulga anglaing pito ka sibilyan sa Gaston, Lagonglong nga gilangkuban nilang Brgy. Capt. Jenny Dagala, Kagawad Meme Dagala, Jennifer Dagala, ZaldyDagala, Inday Sinatao, Ramon Oblios ug Jun Balabag.

Dugang pa, gihasi sab si Kagawad Bobong Salvania ug Angelito Alingyabon nga taga-Kabulawan sa maong lungsod. 

Sa laing bahin, gihulga gihapon sa makaduha na ka higayon ang mga mag-uumang si Rico Dablo ug Ernesto Ahay nga parehong taga-Brgy. Umagos. Si Ernesto Ahay nalakip sa daghang mga mag-uuma nga giisyuhan og warrant of arrest sa kasong lambigit sa Guingona nga insidente. Tulo na ang dili makatarunganong gipang-aresto ug nag-antus sa bilangguan sulod sa pila na ka bulan karon tungod kay gipasanginlan sa kaso nga bisan gamay wala silay kalambigitan.

Klaro nga walay bisan unsang pagpahumot ang makatago sa tinuod nga pasistang kinaiya sa AFP nga kasundaluhan sa mga nagharing hut-ong, mga sinuhulang tropa sa rehimeng US-Aquino batok sa mga kabus nga katawhan. Kung nagtuo ang militar nga mohuyang ang armadong pakigbisog pinaagi sa pagpasaka’g mga kaso, pagpanghuraw ug uban pang paglapas sa tawhanong katungod sa mga sibilyan, samot lang hinuon niining paypayan ang pagdilaab sa rebolusyonaryong pagsukol sa mga dinaugdaug ug pinahimuslang katawhan.