Helicopter sa AFP Gibirahan sa NPA, Nag-emergency Landing

Lorena Mangahas
NPA-Eastern Misamis Oriental-Northeastern Bukidnon Sub-regional Command
Oct. 4, 2013

Nag-emergency landing ang duha ka UH1H Huey Helicopters sa Air Force sa schoolground sa Balingasag Central Elementary School human girapido sa mga tim sa usa ka yunit sa New People's Army ilalum sa Eastern Misamis Oriental-North Eastern Bukidnon (NPA-EMONEB) Subregional Command. Nahitabo ang pagbira didto sa Sitio Kapatagan, Brgy, Umagos, Lagonglong, Misamis Oriental niadtong Oktubre 3, 2013, mga alas 2:50 sa hapon.



Ang maong mga transport helikopter mokuha sa lima ka napatay nga sundalo gikan sa nahitaboan sa duha ka hugna nga pag-atake sa mga Pulang manggugubat.   Mga alas 8:00 sa buntag sa maong adlaw dihang unang giharass sa usa ka tim sa NPA ang blocking force sa 58th IB sa Sitio Kapatagan, Umagos, Lagonglong nga mikalas sa kinabuhi sa duha ka sundalo. Sunod nabirahan sa NPA ang pasistang tropa nga anaa sa mao ra gihapong lugar mga alas 12:00 sa udto nga miresulta sa laing tulo pa ka patay.

Tungod niini, wala nakuha sa helicopter ang ilang mga patay. Nagpatabang na lang ang reaksyonaryong  kadundalohan sa mga barangay officials sa Umagos  para mapagawas ang ilang kaswalidad.

Walay kapuslanan ang pagpangugat sa pagpangulipas sa tigpamaba sa 4th ID nga si Capt. Uy.  Dili makatago sa mga mata sa natugaw nga kaestudyantehan ug mga lumulupyo ang 14 ka buslot-pinusilan sa usa ka helicopter nga nagtugpa sa nataran sa eskwelahan sukwahi sa gibalik-balik sa tigpamaba nga ordinaryong mechanical problem lang ang nasinati sa ilang helikopter.  Ang pagpalihok sa mga barangay officials aron pagkuha sa ilang kaswalti tataw nga pagpamatuod sa natagamtaman nga kadaut sa ilang mga nag-operasyong tropa.

Sa pikas bahin, luwas nga nakaipsot ang mga kauban human sa mga panagsangka.
Sa kasamtangan, padayun ang "relentless" operation sa AFP sa mga kabukiran sa Misamis Oriental. Nagapadayon usab ang mga yunit gerilya sa NPA sa pagtigum sa ginagmay'ng mga kadaugan nga samot nagapahuyang sa moral sa mga reaksyunaryong kasundalohan.