Serye sa mga aksyong militar sa NPA-NCMR, 16 Patay

Allan Juanito
NPA- North Central Mindanao Regional Command
Oktubre 2, 2013

Sulod lang sa tulo ka adlaw, 16 ka sundalo ang napatay ug laing unom pa ang samaron gumikan sa sunod-sunod nga mga aksyong militar sa New People's Army sa North Central Mindanao Region. Ang musunod mao ang detalye sa mga panghitabo:

Sept. 29, 2013 mga alas 6:00 sa buntag - napatay ang usa ka Junjun Versano usa ka aktibong asset-impormer sa AFP ug gikaintapang tulisan nga taga-San Isidro, Calabugao, Impasug-ong, Bukidnon dihang misukol sa yunit sa New People's Army ubos sa Eastern Misamis Oriental – North Eastern Bukidnon (EMONEB)   Subregional Command  nga moaresto kaniya. Nakuha gikan kaniya ang usa ka improvised nga pistola.

Sept. 30, 2013- bandang alas 5:00 sa buntag, giharass sa mao gihapong yunit sa New People's Army ubos sa Eastern Misamis Oriental – North Eastern Bukidnon (EMONEB)  Subregional Command ang Army-CAA Detachment sa Km. 30, Brgy. Calabugao, Impasug-ong, Bukidnon.

Sept. 30, 2013- duha ka hugna sa panag-engkwentro ang natigayon sa Sitio Camansi, Brgy. Banglay, Lagonglong, Misamis Oriental. Mga alas 9:00 sa buntag unang gi-isnayp sa team sa laing yunit sa New People's Army ubos sa Eastern Misamis Oriental – North Eastern Bukidnon (EMONEB) ang nag-hot pursuit operasyong tropa sa 58th IB. Usa ang nasamdan nga sundalo human niini.

Ang ikaduhang opensiba nahitabo mga alas 2:00 sa hapon dihang napabuthan sa mga Pulang manggugubat gamit ang command-detonated explosive ang gidak-ong kumpanya nga tropa sa 58th IB sa mao ra gihapong lugar sa Sitio Camansi, Brgy. Banglay, Lagonglong, Misamis Oriental. Patay ang 10 ka sundalo ug laing lima pa ang samaron.  Diha-diha mireimpors ang MG 520 nga nagbuhi og tulo ka rockets. Paturagas nga gitarget sa ilang pagpamomba nga gipatugpa sa sapa, ibabaw sa Sitio Camansi ug duol sa Sitio Tapul. Nagresulta kini  sa pagpamakwet sa 73 ka pamilya.

Sa pikas bahin, sa duha ka panghitabo, walay kaswalidad nga naangkon ang platun gerilya nga nagpatuman sa maong pag-atake.

Oktubre 1, 2013- giharass sa yunit sa NPA, mga bandang alas 8:00 sa buntag, ang Army-CAA Detachment sa Hagpa, Impasug-ong, Bukidnon.

Oktubre 1, 2013- duha na usab ka panghitabo ang natala didto sa Sitio Camansi, Banglay, Lagonglong, Misamis Oriental. Sa mga ala 1:00 sa hapon,  gibirahan sa mga kauban ang mga sundalo sa 58th IB nga naghuot samtang nangransak sa usa ka balay nga walay tawo. Lima ang patay sa maong tulisan nga mga tropa. Ang ikaduhang pag-atake natigayon dihang gibirahan sa mga Pulang hukbo ang nagresponde nga helicopter, mga alas 2:00 sa hapon.

Sa laing bahin, gikumpirma namo ang naunang gireport sa tigpamaba sa 4th ID nga pagbuhis og kinabuhi ni Joel “Ka. Jenan” Fajardo ug Margie “ Ka. Jenjen” Almahan nga mga sakop sa NPA sa engkwentro nga nahitabo sa Brgy. Busdi, Malaybalay City, Bukidnon niadtong Septyembre 22, 2013, mga alas 8:00 sa gabie. Apan wala giapil sa taho ni Capt Christian Uy nga mabayanihong misukol ang maong iskwad sa NPA batok sa platun sa 8th IB kung asa 3 ang patay sa tampi sa mga sundalo. Sukwahi sa gipasangil ni Capt. Uy nga nangilkil,  ang maong yunit sa NPA nagapatuman sa ilang pulitikanhong gimbuhaton sa pagpasabot sa mga masa bahin sa dautang epekto sa planong pagpundar sa plantasyon sa mga dagkung negosyo sa napier grass sa maong lugar. 

Bisan patay-limod ang kasundalohan sa pag-asdang sa rebolusyonaryong kalihukan dinhi sa rehiyon, apan ang serye sa mga opensiba sa NPA ug nagkadakong ihap sa kaswalidad sa AFP ang mupamatuod sa pagkusog sa armadong pagsukol sa katawhan. Kini ang atong makatarunganong tubag sa bangis nga kontra-rebolusyonaryong Oplan Bayanihan nga nagapanalipod sa gobyernong Aquino nga ginalubok sa krisis tungod sa pagkabutyag sa iskandalo sa pork barrel nga nagkawkaw sa kwarta sa kabus nga mga magbubuhis ug uban pang mga kahiwian. Misamot pa gayud kini karon nga nagakaunlod sa huyong-huyong sa krisis tungod sa grabe nga pinansyal nga problema sa iyang among imperyalismong US nga nagresulta sa parsyal nga pagsira sa  pipila ka mga buhatan sa gobyerno sa US.    Sa pagsubsob niini nga gubat, lauman ang daghan pang opensiba sa NPA batok sa armadong kusog nga lunod-patay'ng tigpanalipod sa dunot nga  semipyudal ug semikolonyal nga sistema nga karon ilalum sa pagrenda sa itoy nga rehimeng US Aquino.