29th IBPA namakak na usab! Nagpatay og sibilyan, gipasangil nga membro sa BHB!

Ka Maria Malaya
NDF-NEMR
Abril 29, 2014

Sa buntag sa April 28, 2014 namahayag sa radyo ang spokesperson sa army nga nakapatay na usab sila og membro sa Bagong Hukbong Bayan (BHB).  DAKUNG BAKAK KINI! Dili membro sa BHB, kundili usa ka sibilyan nga ginganlan og Ricardo “Polon” Tuazon ang gipusil-patay sa tropa sa nag-operisyon nga 29th IBPA didto sa bukid sa Butuan City.

Abril 27, dunay combat operation sa mga tropa sa 29th IBPA sa bukid sa Dogyaman,  Brgy. Anticala, Butuan City. Sa mao nga adlaw ang mag-ama nga Ricardo ug Junior Tuazon uban ang usa ka Jesan Aparelya nangati o nangdakop og langgam alimokon sa bukid sa Nakabdong nga sakop sa Dogyaman, Brgy. Anticala, Butuan City. Naabtan ang tulo (3) sa may alas 3:00 kapin sa hapon, sa mga nag-operisyong militar nga gikan sa San Antonio, Cabadbaran, Agusan del Norte. Sa walay pagsusi gipamusil sila ug igo-patay si Ricardo “Polon” Tuazon. Ang duha (2) niya nga kauban sa pagpangdakop og langgam nakadagan ug nakauli sa ilang sityo. Karong buntag giadtoan sa mga paryente ug mga silingan ang nahitaboan ug nakita nila ang patay’ng lawas ni Ricardo “Polon” Tuazon nga gibiyaan sa mga militar.


Ang mga paryente ug silingan magpamatuod nga dili membro sa BHB ang gipusil sa militar nga si Ricardo “Polon” Tuazon. Sibilyan kini nga walay ikasukol, nga igo lang nanakop ug langgam alimokon.

Sa laing paghitabo niadtong Abril 27, 2014, sa may alas 7:30 sa buntag, gi-isnayp/harass sa mga membro sa Platun Cabadbaran-BHB sa F21 ang mga militar  nga sakop sa 3rd Special Forces (SF) Batallion ug 29th IBPA. Napatyan og usa ka elemento sa SF nga nagduyan-duyan panahon sa pagbanat sa BHB. Ang maong mga pwersa dugay ng nagpondo sa Sityo Lusong, Puting Bato, Cabadbaran, Agusan del Norte. Kining ilang operasyon militar sa kabukiran sa Agusan del Norte nagsugod pa niadtong Marso 30, 2014. Nagkampo ang mga nag-operisyong militar duol sa kabalayan sa Sityo Lusong, Ansili ug bukid sa Dagnasay.

Sa mao gihapon nga adlaw sa may alas 10:00 sa buntag, na-isnayp na usab sa mga BHB ang laing grupo sa army didto sa bukid sa Kamalig tabok sa Cabadbaran River ug atbang sa Sityo Lusong. Duha (2) ang nasamdan sa mga army.

Mahinumduman nga April 5 niini nga tuig nasilotan usab sa BHB ang minahan sa Asia Alston taliwala sa operisyong militar sa kabukiran sa Agusan del Norte nga nagsugod niadtong Marso 30, 2014. Ang pagsilot sa  Asia Alston gikalipay sa mga tag-iya sa yuta ilabina ang mga nailogan sa ilang mga umahan sa abaka kay minahon  sa langyaw’ng kompanya. Naguba sa mga kauban ang mosunod nga makinarya:  duha (2) ka backhoe, duha (2) ka buldozer, tulo (3) ka dumptruck, usa ka motor ug naguba ang opisina.  Nakompiska ang duha (2) ka .45 pistola, duha (2) ka 38 rebolber, usa (1) ka shotgun, duha (2) ka laptop computer ug desisayes (16) ka VHF radio. Kini nga kompanya gawas nga langyaw nga nagpahimulos ug maghakot sa atong mga minerales, isog kaayong nangilog sa mga yuta sa mga kabus nga Pilipinong mag-uuma. Magguba na usab kini nga minahan sa atong kabukiran ug kay langyaw man, wala kini hunahuna sa pag-amping sa kabukiran.

Padayon nga silotan sa Bagong Hukbong Bayan sa North Eastern Mindanao Region (BHB-NEMR) ang mga nagguba sa atong kabukiran ug kinaiyahan! Kini nga mga negosyo dili tinuod nga nakatabang sa panginabuhian sa katawhan kay barato kaayo ang sweldo sa mga mamumuo, lisod ang kahimtang sa panarbaho ug mga kontrakwal ang mga trabahante ug nagguba sa kinaiyahan nga tinubdan sa panginabuhian sa katawhan. Mamugnaon ug mapangahasong banatan usab sa BHB ang militar nga sustinidong naglunsad sa mga operasyon militar aron depensahan ang mga minahan ug uban pang langyawng negosyo ug plantasyon.