Malampusong pagsaulog sa ika-45 nga anibersaryo sa BHB sa Northcentral Mindanao

Norsen Mangubat
CPP North Central Mindanao Regional Committee
April 2, 2013

Malampusong gisaulog sa BHB ubos sa North Central Regional Command  sa NCMR ang ika-45 ka tuig nga kasumaran sa pagkatukod sa tinuod nga kasundalohan sa katawhan.  Isip pangabli sa makasaysayanong adlaw sa rebolusyon, untop alas 12 sa udto ug dungan sa ubang pang yunit sa BHB sa tibuok nasud, gipasidunggan ang mga rebolusyonaryong martir ug bayani pinaagi sa 21-gun salute ug pagparada sa mga bandera PKP, BHB, NDF ug bandera sa DGK (Demokratikong Gobyerno sa Katawhan).



Isip pagsaludo usab, gihinumdom ug gibasa ang kapin 200 ka mga pangalan/koda sa mga rebolusyonaryong martir sa rehiyon gikan sa pagkatukod niini niadtong 1981. Gibasa usab ang pipila ka mga sugilanon sa kinabuhi ug pakigbisog sa mga iladong martir. Usa niini si Ka Ben Esparagoza ug iyang kuyog nga usa ka iskwad nga namartir niadtong 1971 sa utlanan bahin sa Misamis Oriental ug Agusan del Norte tungod sa pagtraydor ni Ricardo dela Camara . Sila maoy pinakaunang yunit sa BHB nga gideploy sa Mindanao gikan sa Visayas sa tuig 1971.  Pipila nga namartir usab mao silang Ka Cesar "Andy" Cayon (1983), Ka. Juanito (1984),  Ka. Julito "Gareb" Tiro (1984), Ka. Hucad "Jabbar" Mandahinog (1992).

Ang maong pagsaulog gisalmotan sa pipila ka platun sa BHB ug gatosan ka mga masa gikan sa mga baryo  ug  sa mga komunidad sa Lumad.  Ubay-ubay nga mga pasundayag ang gipresentar sa mga Hukbo ug masa sa upat ka oras nga programa. Pipila niini mao ang paghulagway sa pagpangilog  sa  mga yutang kabilin sa mga lumad ug ang ilang pagdangop sa demokratikong rebolusyon  ug mga lumadnong pasundayag sama sa war dance, monkey dance ug mga rebolusyonaryong awit.