Opisyal sa paniktik ng AFP at PNP, patay sa operasyong partisano

Ka Samuel Guerrero
Celso Minguez Command - NPA-Sorsogon
Hunyo 11, 2014

NAPATAY sina Sgt. Rene Madrona at PO2 Christopher Escreza sa magkasunod na ispesyal na operasyon ng Bagong Hukbong Bayan nitong Hunyo 10 at 11.

Si Sgt. Madrona ay operatibang paniktik ng Philippine Army na humahawak sa lambat ng mga impormante laban sa rebolusyonaryong kilusan sa mga barangay ng Bulusan, Sorsogon. Binira siya ng mga Pulang mandirigma malapit sa kanyang tirahan sa Brgy. Poctol, Bulusan bandang alas-8:00 ng gabi nitong Hunyo 10.

Si PO2 Escreza ay intelligence officer ng Philippine National Police na aktibong naglalatag ng kontrarebolusyonaryong lambat paniktik sa mga barangay ng Barcelona, Sorsogon. Napatay siya sa operasyon ng BHB sa poblasyon ng Barcelona bandang alas-4:00 ng hapon nitong Hunyo 11. Nakumpiska sa kanya ang isang pistolang 9 mm.

Ang magkasunod na operasyon ay bahagi ng pinag-iibayong kampanya ng BHB para wasakin ang makinaryang paniktik ng reaksyunaryong militar at pulisya sa probinsya.