Malamposon ang pagsulong sa BHB sa PNP Station sa Alegria, Surigao del Norte

Maria Malaya
NDFP-Northeast Mindanao Region
Hulyo 12, 2014

Congratulations sa mga yunit sa BHB sa Front 16 sa ilang malamposong pag-raid sa PNP Municipal Station sa Alegria, Surigao del Norte.  Nakasakmit ang BHB og 8 ka M16 ug ubay-ubay nga mga hand gun ug bala, ug nakadakop og upat ka pulis isip Prisoners Of War (POW).

Samdon si PO2 Romero Beniga Dagsa ug PO2 Reuben Casimero Salino, samtang duha ka Pulang manggugubat ang bayanihong nakalas.  Walay pay dugang detalye sa mga kaswalti sa banatan tali sa nagrespondi nga tropa sa  PNP-AFP ug sa BHB blocking force. Gikasubo namo nga naangin ang usa ka sibilyan nga naa sulod sa PNP Station atol sa maong higayon.  Among paningkamutan nga makatabang sa pagpatambal sa hingtungdan.  Buot usab kami mangayo’g pasaylo tungod sa kahasol ug kalangan nga gidulot ngadto sa publiko.

Sa pikas bahin misaludo kami sa mga kauban nga bayanihong nakalas ug miduyog kami sa kasubo sa ilang mga kaparyentihan ug kahigalaan.

Ang mga Municipal PNP Station kabahin sa kinatibuk-ang armadong instrumento sa pagpanumpo sa estado, busa lihitimo kini nga target sa Hukbo sa katawhan – ang BHB.   Gawas pa niini, ang mga kapulisan sa Alegria, dili inosente sa suliran sa iligal nga druga, pangilkil, kabangis ug ubang naandang binuhatan sa sinuholan nga berdugo sa reaksyonaryong estado.  Aron malikayan ang wala gikinahanglang kaswalti sa mga PNP personnel, among awhagon sila nga mosurender dayon sa higayon nga moataki ang mas superyur nga pwersa sa BHB.

Gikumpirma usab sa BHB Kumand sa Rehiyon sa NEMR nga Prisoners of War (POW) karon ang upat ka pulis nga sila si PO3 Vic Calubag Concon, PO1 Rey O’niel Morales, PO1 Joen B. Zabala ug PO1 Edito F. Roquino.  Among ipasalig sa mga kaparyentihan ug higala ning upat ka POW nga makatarunganon ug tawhanong tagdon sila sa BHB custodial force subay sa Batakang Lagda sa Bagong Hukbong Bayan ug CARHRIHL.  Dugang namong ipasalig nga moagi sa proseso sa pagsusi kung duna bay tulobagong kriminal o wala ang mga POW ngadto sa katawhan ug sa rebolusyonaryong  kalihokan.

Kung mapamatud-an nga walay ilang seryosong kasal-anan,  mahimong buhian sila.  Apan aron paspas ug mapasayon ang proseso sa pagsusi sa posibleng tulobagon sa upat ka POW kinahanglang undangon ang mga opensibang operasyon sa tibuok probinsya sa Surigao del Norte ug kasikbit nga mga lungsod sa Agusan del Norte.