Pinal nga report sa ataki sa BHB sa Alegria PNP Station

Maria Malaya
NDFP - Northeast Mindanao Region
Hulyo 12, 2014

Kini mao ang report gikan sa kumand sa Front 16 sa NEMR kalabot sa malamposong pagsulong sa BHB sa Alegria PNP station niadtong bandang alas 3:00 sa hapon sa Hulyo 10, 2014.

Human sa kapin kun kulang 5 ka minuto nga sinukliay sa bala, nakontrol na ang istasyon sa pulis.  Apan usa ka Pulang manggugubat ang naigo ug namatay diha-diha, samtang samdon ug misurender si PO2 Romero Beniga Dagsa ug PO2 Reuben Casimero Salino. Nakumpiska sa BHB ang 4 ka M16, 1 ka M14, 1 ka M4, 5 ka shotgun ug 6 ka handgun.  Apan nagub-an ang BHB og usa ka M16 ug usa ka AK47 nga pusil.

Ang blocking force sa BHB sa Surigao del Norte nga direksyon, miharang sa upat ka pulis nga nagsakay sa ilang patrol car, nga napugos pagsurender sa ilang 3 ka M16 ug 4 ka handgun.   Gidala sa BHB ang 4 ka pulis isip mga POW o Prisoners of War. Sila mao si: PO3 Vic Calubag Concon, PO1 Rey O’niel Morales, PO1 Joen B. Zabala ug PO1 Edito F. Roquino.

Mokabat tanan sa 24 ka nagkalain-laing kalibre nga pusil ang nakumpiska sa BHB: 9 ka tag-as nga kalibre, 5 ka shotgun, 10 ka handgun.

Dihang miatras na ang tropa sa BHB nga dala ang ilang kaubang namatay, nadaut ang ilang gisakyan sa tunga-tunga sa Kitcharao ug Alegria. Tungod niini napugos sila pagnaug apan gipamusil sila sa 5 ka pulis nga misagol sa mga estudyante nga naa sa palibot, nga hinungdan sa naglisud pagpusil ang mga BHB sa paglikay nga mapagan ang mga sibilyan busa napatyan na usab og laing Kauban.  Napugos pag-atras ang tropa sa BHB, apan nabilin ang duha ka patay apil ang daut nga 1 ka M16 ug 1 ka AK47 ug ubay-ubay nga mga back pack.

Ang mga Municipal PNP Station kabahin sa kinatibuk-ang armadong instrumento sa pagpanumpo sa estado, busa lihitimo kini nga target sa BHB, ang Hukbo sa katawhan.   Gawas pa niini, ang mga kapulisan sa Alegria, dili inosente sa suliran sa iligal nga druga, pangilkil, kabangis ug ubang naandang binuhatan sa sinuholan nga berdugo sa reaksyonaryong estado.  Aron malikayan ang wala gikinahanglang kaswalti sa mga PNP personnel, among awhagon sila nga mosurender dayon sa higayon nga moataki ang mas superyur nga pwersa sa BHB.

Sa pagkakaron anaa sa maayong kahimtang ang panglawas ang upat ka POW, gawas lang sa mga kalisdanan sa gerilyang kinabuhi.  Apan dili angay mabalaka ang ilang kaparyentihan kay ayuhon sila pagtratar sa BHB subay sa mga lagda ug palisiya sa BHB ug subay sa mga internasyonal nga balaod sa gubat ug sa tawhanong pagtratar sa mga bihag sa gubat.  Kung ikatugot sa kahimtang mohatag og report ang custodial force sa BHB kalabot sa kahimtang sa 4 ka POW.
 
Moagi sa proseso sa imbistigasyon ang upat ka POW kung wala bay ilang kriminal nga kalambigitan batok sa katawhan ug sa rebolusyonaryong kalihokan, ug mahimong buhian ang walay kasal-anan samang mahimong itaral sa hukumang bayan sa rebolusyonaryong kalihokan ang sad-an. Aron mapaspas ang proseso sa imbistigasyon kinahanglang temporaryong undangon sa AFP-PNP-CAFGU ang ilang mga opensibang operasyon.

Awhagon namo ang mga kaparyentihan sa mga POW ug mga opisyales sa gobyerno ug mga nagpakabanang mga pundok nga ilang awhagon ang gobyerno nga ipaundang ang opensibang operasyon sa kaaway sa tibuok Surigao del Norte ug mga silinganang lungsod sa Agusan del Norte aron mapapaspas ang proseso sa imbistigasyon ug sa pag-release sa angay buhian.