26th IB, Napatyan og Duha ka Sundalo sa San Luis, Agusan del Sur

KA Omar Ibarra
NPA WANAS Sub-regional Command

Agosto 10, 2014

Giatake sa harassment team sa New People’s Army ilalom sa Western Agusan Norte-Agusan Sur (NPA WANAS) Sub-regional Command ang nag-operasyong tropa sa 26th Infantry Battalion-Philippine Army ug Bagani Force didto sa Km. 50, Brgy. Binicalan, San Luis, Agusan del Sur niadtong Agosto 9, 2014, mga bandang 4:30 sa hapon. Duha ang patay ug daghan ang samaron sa reaksyunaryong hukbo samtang walay kaswalidad sa miatakeng yunit sa NPA.
Niadtong tungura, kampante ug saba kaayo nga nagpahulay ang maong tropa sa pasistang kasundalohan, sa pagtuo nga naabog na sa ilang dinagku nga operasyon ang mga yunit sa NPA. Wala sila nagdahom nga nagbuhi usab og mga harassment teams ang NPA nga relatibong mas nasuheto sa tereyn ug nagtagamtam sa lalom ug lapad nga suporta sa katawhan sa erya. Gipaarakan gilayon sila sa mga Pulang manggugubat, ug diha-diha, duha ang nahagba-patay sa nagtapok-tapok nga tropa, ug hisamdan sab ang wala pa natino nga gidaghanon nila. Paspas nga nakaatras ang harassment team sa NPA human sa insidente.


Ang maong platun sa 26th IB usa lang sa unom ka mga kolum nga nagapahigayon karon og combat operation sa mga bukirong bahin sa lungsod sa SanLuis, Talacogon ug La Paz, Agusan del Sur. Tumong niini nga abugon ang tinuod nga sundalo sa mga kabus, ang NPA, aron kahatagan og dalan ang walay-pugong nga operasyon sa mga nagtunhay nga kompanya ug plantasyon sa maong mga lungsod. Ekonomikanhong interes lang sa mga mangawkaway nga langyawng kapitalista ang gipanalipdan sa mga binayrang AFP maong nagkakusog ang mga operasyon niini batok sa rebolusyonaryong kalihukan. Kahinumduman nga una nang na-engkwentro sa mga Pulang manggugubat ang laing tropa sa 26th IB ug SCAA niadtong Agosto 9 samtang gigwardyahan nila ang Provident Tree Farm Incorporated didto sa Zelovia, Talagocon.

Sa laing bahin, naa usab natigayon nga harassment operation sa NPA batok sa mga nag-operasyong tropa sa reaksyunaryong kasundalohan didto sa Brgy. Afga, Buenavista, Agusan del Norte sa susamang adlaw, Agosto 9. Magpagawas lang kami og kumpletong detalye kabahin niini kung makahatag na og combat report ang maong operating yunit sa NPA.