Rescue operations sa 8th IB giharass sa NPA

Allan Juanito
New People’s Army- North Central Mindanao Region
September 24, 2014

Taliwala sa hangyo sa duha ka Prisoners  Of War nga silang Pfc.Marnel Cinches ug Pfc.Jerrel Yorong ngadto sa ilang kadagkuan nga matabangan sila aron luwas nga makapauli sa ilang tagsa-tagsa ka pamilya, padayong combat operation ang tubag sa ilang mother unit nga 8th IB.  Damgo sa udtong tutok angpagpangandoy nga ma-rescue ang duha ka sundalo.

Niadtong Septyembre 22 sa alas 6:30 sa buntag, usa ka kolum sa tropa sa 8th IB ang giharass sa usa ka tim sa NPA sa Sityo Mahan-aw, Bolunay, Impasug-ong, Bukidnon.  Pagka-alas 8:00 sa buntag sa mao ra gihapong adlaw, laing kolum sa nag-operasyon nga mga tropa ang giharass sa laing tim sa NPA sa Sityo Magawa, Bolunay.



Nagpakabuta-bungol ang mga upisyal AFP sa 4ID ug 8th IB sa pagpakitabang sa mga pamilya sa mga hingtungdan.  Nasayud sila nga ang ilang militaristang lakang nga gitugbangsa panawagan alang sa gamayng kahigayunan sa kalinaw, nagbutang sa peligro sa kaluwasan sa ilang mga sundalo.  Kung may deklarasyon sa SOMO/SOPO niadtong miaging semana, nakapauli na unta ang duha ka sundalo, nahupay na ang mga kabalaka sa ilang mga pamilya ug dili na madugangan pa ang kaswalti sa 8th IB.Pipila ka adlaw nga SOMO lang ang gipaabot sa custodial unit sa NPA nga nag-atiman sa duha ka POW aron ipatuman ang mando sa NDF sa luwas nga pagturn-over kanila ngadto sa Third Party Facilitators ug mga nagpakabanang upisyal sa GPH.

Sa laing bahin, giparalisa sa usa ka yunit sa NPA ilalum sa South Central Bukidnon Sub-Regional Command ang duha ka payloader ug usa ka dumptruck sa Uy Builders Devt. Corp.sa Liloan, Lumbayao, Valencia City, Bukidnon niadtong gabii sa September 21.  Gidaugdaug ug gipahimuslan sa management niini nga kumpanya ang ilang mga trabahante sa dili makitawhanon nga pagtratar ug paghatag kanila sa hilabihan ka ubos ang suhulan.