Masingki nga militarisasyon kag tudo-larga nga development aggression sa Central Negros ginpakigbatuan! Taktikal nga opensiba sang bag-ong hukbo sang banwa nagmadinalag-on!

Ka JB Regalado
Leonardo Panaligan Command-BHB Central Negros
October 15, 2014

Sa tunga sang masingki nga military operation sang AFP kag tudo-larga nga development aggression sa Central Negros madinalag-on nga nakatigayon ang BHB idalum sang LPC-BHB sang mga taktikal nga opensiba sa porma sang harassments, warning-dis- arming kag nyutralisasyon. Natigayon ang tatlo ka harassments sa mga detachments sang 12th IBPA sa Negros Oriental kag Occidental nga nagresulta sang kamatayon sang masobra 4 ka AFP. Madinalag-on man nga nakadis-arma ang BHB sa duha ka malain nga elemento sa baryo nga nakakumpiska sang 2 ka short arms, mga bala kag lohistika-militar. Nanyutralisa man sang BHB ang kapin 9 ka katapuan sang CAFGU kag mga kriminal sa sakop sang larangan kabangdanan sang ila pag-untat sa kontra-rebolusyon kag kontra-sosyal nga mga hilikuton kag nanumpa nga magpaidalum sa polisiya kag patakaran sang rebolusyonaryong kahublagan.



Septyembre 16,2014-alas 11:00 sang kagab-ihon ginpaarakan sang yunit sang NPA ang 12th IBPA detachment sa Brgy Alingasaw, Moises Padilla Negros Occidental nga nagresulta sang direkta nga kamatayon sang 2 ka AFP nga hungod man ini nga gintago sa publiko ang ila mga kaswalidad. Suno sa mga residente direkta nila nakita ang 2 ka bangkay sang militar nga ginhakwat gikan sa ila kampo. Ginhimo ini sang BHB para hatagan sang hustisya ang mga biktima sang mga paglapas sa tawhanon nga kinamatarung sang sini nga mga militar. Ini nga mga militar ang may daku nga kahilabtanan sa pagpatay kay Toto Quirante sadtong October 1, 2010 sa paggiya nila Leonel Librado nga tubtob subong padayon nga ginahuptan sang militar sa pihak sang napana-ugan na sang mandamiento de aresto sang reaksyonaryong korte sa Guihulngan, Negros Oriental. Responsable man ini nga detachment sa pagtago sang 8 ka mga katapuan sang CAFGU nga naghimulos sa isa ka minor de edad nga pamatan-on sadtong Enero 2011. Ang iban sini sa 8 ka CAFGU nasilotan na sang hublag apang ang iban nagpabilin pa nga nagaduty sa sini nga kampo-militar.

Septyembre 20 sang gab-i, ginharas man sang BHB ang Brgy Balugo CAFGU detachment sa Guihulngan, Oriental Negros nga nagsamad sa 2 kag pagkapatay sang 2 man ka militar. Liwat naman nila ini nga ginpanginwala sa publiko.

Oktubre 3 sang gab-i gihapon, ginrapido man sang unit sang NPA ang Brgy Tinayunan Hill CAFGU detachment nga nagresulta sang kamatayon sang isa ka militar kag pagkapilas pa sang iban. Liwat gihapon ini nga ginlikom sa pumuluyo ang ila kaswalidad. Samtang ang NPA hilway nga naka-atras.

Ang ini nga mga detachments ang ginasustento sang binulan nga tag 30 mil pesos gikan sa lokal nga gobyerno kag mga dumuluong nga kapitalista para maghatag sang proteksyon kag seguridad sa mga plano sini nga kontra pumuluyo nga proyekto pareho sang pagpatanum sang mga kahoy sa binukid sang La Libertad, Guihulngan, Binalbagan, Isabela, Himamaylan kag Magallon. Ang ini nga kantidad nga ginasustento sa sini nga mga kampo-militar ginabulsa lamang sang mga commanding officers kag wala ginpahibalo sa mga CAFGU.

Ang madinalag-on nga mga taktikal nga opensiba sang LPC-BHB sabat lamang sa mga demanda sang pumuluyo sa Central Negros sa pagpangapin sa ila duta kag palangabuhian sa pihak sang nagaduging kag lapnagon nga pagpang- agaw sini sa ila paagi sa development aggression kag kapid sini nga militarisayon sa kaumahan sa pagpanguna ni Gov. Alfredo Marañon sa ngalan sang matam-is pa sa kalamay nga kutob lang sa dila nga “Peace and Development”. Ang matuod nga kauswagan kag kalinong indi maangkon sa hambal lamang kundi ini ginahimakasan sang sahing anak-balhas para pangapinan ang iya kinamatarung kag palangabuhian. Gani maagaw lamang ang gahum pulitika paagi sa lupok sang pusil sang nagahimakas nga pumuluyo batok sa reaksyonaryong poder sang burukrata-kapitalista, dalagkung kumprador burgesya kag agalon may duta kaangay ni Gov. Marañon sang Negros Occidental. Ang “Negros First” nga development plan ni Marañon labi nga nagpaantus sa pumuluyo sang probinsya labi na sa Central Negros kag segurado dugang ini nga magpa-igting sang armadong paghimakas sa kaumahan bangud wala ini sang kabilinggan sa pangabuhi sang mga mangunguma kag mamumugon sa uma. Sa baylo naglubong pa ini sa ila gina-atubang nga kapigaduhon kag kaimulon tungod sang presensya naman sang mga multi-national kag trans-national corporations pareho sang Dole Philippines kag iban pa sa pag-establisar sang ila maki-dumuluong kag kontra-pumuluyo nga negosyo. Dugang pa sini ang pagdata naman sang human rights violations sa kaumahan. Tuyo man sini nga patalangon ang pumuluyo kag kuhaan sang duta kag palangabuhian sa baylo palaparon kag padakuon ang ila negosyo pareho sa pagpatanum sang pinya, rubber tree, palm-oil kag iban pa. Tudo-larga ini nga ginbuksan ni Gov. Marañon sa mga dumuluong para kamasaan ang dunang manggad sang probinsya ilabe na ang kinto-distrito, sa pihak sang pagpamatok sang mga pumuluyo sa kasyudaran kag kaumahan sa bug-os nga probinsya. Kaangay lang si Marañon sang isa ka bungol nga baka ukon karnero nga indi makabati sa ugayong sang kagutom kag hinanaing sang nagkalain-lain nga sektor sa probinsya. Subong man kaangay man siya sang sobra ka gutom sa poder nga bakero sang baka kag karnero nga gusto pa maglapta sang iya ramag sa poder sa pagdominar sa Negros Oriental sa iya ginabuko nga “One Island, One Region” para isahon ang bug-os nga isla sa iya personal nga ka pretso kag mga intereses sa pihak man sang pangkadiskontento sang mga tradisyonal nga pulitiko, burukrata-kapitalista kag agalon may duta sa Negros Oriental kag Central Visayas.

Ginapanawagan sang LPC-BHB nga isahon ang aton kusog sa pagpamatok kag lig-on nga awayon kag ilubong sa kaumahan ang mga ginatumod nga mayor-koter sang development aggression! Ginamanduan man ang tanan nga yunit sang BHB nga ilunsar ang lapnagon nga taktikal nga opensiba sa padayon nga pagpangapin sa duta kag palangabuhian sang sahing anak-balhas! Konsolidahon ang baseng masa kag isulong ang agraryong rebolusyon!