Padayong Combat Operation sa AFP Dugang Makalangan sa Pag-release kang Pfc. Marnel Cinches ug Pfc. Jerrel Yorong

Cesar Renerio
NDFP - North Central Mindanao Region
October 14, 2014

Ang nagapadayong combat operation sa 8th IB ug 58th IB tataw nga pagpamatuod sa kawalay pagpakabana sa 4th ID sa hangyo sa mga pamilya sa duha, paningkamot sa mga peace initiators,  local crisis committee sa Bukidon ug uban pang nagpakabanang mga upisyal sa gobyerno sa Pilipinas o GPH. Ang maong kahimtang, dugang nagapalangan sa luwas nga pag-release sa duha ka Prisoners of War (POW) sa New People's Army (NPA) nga anaa na karon sa ika-54 ka adlaw.

Niadtong Oktubre 9, 12:30 sa udto, gi-harass sa usa ka tim sa New People's Army ang mga naga-operasyong tropa sa CAA-AFP sa Kagahuman, San Luis, Malitbog, Bukidnon, kung asa ang membro sa SCAA nga si Racion Libayon ang nahimong kaswalti.


Pagka-petsa 11 sa Oktubre 2014, sa alas 5:30 sa hapon, gi-harass sa laing team sa NPA ang mga tropa sa 8th IB sa sityo Calampigan, Kalabugao, Impasug-ong, Bukidnon kung asa nahimong kaswalidad si Pfc William Salimbaga, membro sa 8th IB ug pagkaangol sa duha ka CAFGU nga gikuha sa Huey helikopter petsa 12 sa udto.

Hangtud karon anaa ang mga naga-operasyong tropa sa 8th IB sa Kalabugao complex sa Impasug-ong nga nagmontar og duha ka 105 kanyon sa barangay Hagpa, Impasug-ong.  Sa samang higayon, sa Palo, Hindangon, Gingoog City, padayon  ang combat operation sa 58th IB nga nagmontar gihapon og 2 ka 105 kanyon.

Kining nagatunhay nga kahimtang, nagabutang sa kawalay kaseguruhan sa kaluwasan sa mga POW mismo, sa ilang mga pamilya ug sa tibuok panon sa mga peace advocates nga mosugat sa duha.  Gikasubo namo pagpahibalo sa ginikanan ni Pfc Cinches nga anaa karon sa tambalanan nga ang kahimtang sa padayong military operation sa AFP mao ang nagapugong sa pagpauli sa iyang anak. Ipasalig namo nga mas maseguro pa ang ilang kaluwasan kung ipabilin silang anaa sa hingtungdan custodial force nga nag-atiman kanila.

Gipakita sa rehimeng U.S.-B.S. Aquino ngadto sa katawhang Pilipino nga ulog-ulog lang ang iyang mga pamulong mahitungod sa tinuod nga kalinaw.  Samtang gipasigarbo niya ang pagkab-ot kuno sa kalinaw sa Mindanao nianang gitughong nga Bangsamoro Basic law, walay lipod-lipod usab ang pagbale-wala  niini sa paghatag og kahigayunan sa kalinaw alang sa mas dakung mga dili-Moro nga lumulupyo sa Pilipinas nga anaa sulod sa teritoryo sa National Democratic Front of the Philippines (NDFP). Ang dili malalis nga pagka-insensitibo sa rehimen, tin-aw nga nagahukas sa pakaaron-ingnong tinguha niini sa pagkab-ot tinuod nga kalinaw ug kalamboan.   Ang kalinaw nga tanyag sa NDFP sa pagbuhi sa mga POW, gitubag sa militaristang mga lakang.  Sama sa mga rehimeng iyang gisundan, wala sila’y laing gidamgo kundili ang pagdugmok sa nagaabanteng nasudnong-demokratikong rebolusyonaryong pakigbisog sa katawhan nga may sosyalistang kapadulngan.