Papanubagon ang pasistang 402nd Brigade sa pagpatay kang Brgy. Kapitan Nicasio “ANGIS” Precioso, Sr!
Ibutyag ang kalapasan sa AFP sa ilang SOMO

Omar Ibarra
New People’s Army, Western Agusan Norte – Agusan Sur Subregional Command (WANAS)
Disyembre 23, 2014

Papanubagon sa  Western Agusan Norte – Agusan Sur sub-regional command ang kriminal nga mga reaksyonaryong tropa ubos ni Col. Dumawa sa 26th IB ug sa 402nd Brigade sa pagpusil-patay kang Barangay Kapitan Nicasio “Angis” Precioso Sr sa Balit, San Luis, Agusan del Sur atol mismo sa yugto sa ilang ceasefire. Disyembre 22 sa alas-8:00 pasado sa buntag, 3 ka adlaw sa dili pa ang Pasko, sa dihang ilang gipatay si Kapitan Angis didto sa Km. 2, Nuevo Trabajo, San Luis, Agusan del Sur.  Magtambong unta siya sa Municipal Peace and Order Council Meeting (MPOC) niadtong adlawa aron hisgutan ang pagpanghasi sa mga yunit sa COPD sa mga baryo sa San Luis.

Si Kapitan Angis lig-ong mibarug sa tingog sa katawhan sa iyang barangay nga kusganong misupak sa pagpundo sa tropa sa 26th IB sa ilang barangay. Daghan na ang dautan nilang kasinatian sa miagi niining RSOT o COPD na karon sama sa pag-unay og pinatyanay sa mga tropa sa AFP gamit ang granada diha mismo taliwala sa barangay niadtong 2005, paglabay sa granada sa balay sa kanhing kapitan Aber Precioso niadtong 2007, pagpasurender sa mga lumulupyo kay NPA kuno, pagpatay kang Datu Mansubaybay Badbaran niadtong 2009, ug dili maihap nga mga kaso sa ilegal nga mga imbestigasyon, pagpangrekisa, ug uban pa.


Busa sa matag meeting nga gipahigayon sa COPD unit, kanunay gihangyo ni Kapitan nga dili magpundo taliwala sa barangay. Kusganon kining gisupak sa COPD team ug mas misamot pa ang ilang pagpanghadlok, pagpangintriga ug gihimo na hinuong hamlet ang Barangay Balit.  Paturagas ang ilang ilegal nga pagpangrekisa, pag-imbestigar, surbeylans, pagbalda sa gawasnong paglihok sa mga tawo, ug uban pa.

Niadtong gabii sa Disyembre 21, 2014 gikompronta sa mga lumulupyo uban ni Kapitan Angis si Sgt. Villaganaz, CMO officer sa Alpha Company sa 26th IB, nga mohawa na sa baryo tungod kay duna man sila’y SOMO ug mo-uli na sa ilang kampo. Gipanghingusog usab nila nga dili magsuroy-suroy ang mga sundalo sa tunga sa baryo ug dili limitahan ang panginabuhi sa katawhan kay umalabot na ang Pasko ug bag-ong tuig.

Pagka-ugma human sa maong hitabo, gipatay nila ang pinalanggang Kapitan sa barangay Balit.

Human sa pagpakita nga buotan kintahay, migawas na ang bangkil sa kaaway! 

Gihagit karon ang tanang katawhan nga dili mahadlok. Gusto sa kaaway nga magtanom og terorismo aron mapalong ang pagsukol sa katawhan batok sa COPD.  Apan samot nga kasilag ang ilang anihon sa ilang pagpatay sa pinalanggang Kapitan.

Walay malauman nga hustisya gikan sa reaksyunaryong gobyerno sa Pilipinas sa kamatayon ni Kapitan Angis. Ang katawhan mismo, uban sa New People’s Army ang maningil niini.

Papanubagon si  Col. Roland Dumawa nga maoy CO sa 26th IB. Papanubagon ang COPD unit nga anaa sa Barangay Balit ilalom ni Sgt. Andres R. Villaganas ug 2nd Lt.  Alven T. Vernez.  Papanubagon ang mga tirador sa Military Intelligence Batallion nga maoy mipusil kang Kapitan Angis.

Nawad-an og usa ka ligdong nga amahan sa baryo ang barangay Balit. Nawad-an og usa ka lig-ong lider ang tribong Banwaon. Nawad-an ang katawhang Pilipino og usa ka matinud-anong tig-alagad.  Apan ang iyang kamatayon mahimong inspirasyon sa mabayanihon ug maisugong pagsukol sa iyang mga kitagibaryo, sa iyang tribo ug sa tibuok katawhan Pilipino hangtud sa kadaugan.

HUGPONGON ANG KAISOG! HUSTISYA ALANG SA KAMATAYON NI KAPITAN NICASIO PRECIOSO, SR.!

PAPANUBAGON ANG PASISTANG KAAWAY SA KAMATAYON NI KAPITAN ANGIS!

SUKLAN ANG OPLAN BAYANIHAN HANGTUD SA HINGPIT NGA KAPAKYASAN NIINI!

MAKIGBISOG, DILI MAHADLOK!