Upat ang patay ug lain pang pito ang samaron sa mga sundalo sa Bravo Company sa 29th IB

Omar Ibarra
New People’s Army, Western Agusan Norte – Agusan Sur Subregional Command (WANAS)
North Central Mindanao Region (NCMR)
Disyembre 23, 2014

Upat ang patay ug lain pang pito ang samaron sa mga sundalo sa Bravo Company sa 29th IB  dihang gipabuthan sa command detonated explosive sa usa ka tim sa New People’s Army ilalum sa Western Agusan Norte – Agusan Sur Sub-Regional Command niadtong Disyembre 22 sa alas 8:00 sa buntag sa Rizal, Buenavista, Agusan del Norte.

Gikan sa command post sa Bravo Company sa Barangay Rizal ang usa ka platun nga tropa padulong sa pagrelyibo sa ilang tropa nga nagpabiling nagpundo sa Sitio Bangkaling, Nongnong, Butuan City sakay sa usa ka six by six truck. Wala na nakabalos pa pagpabuto ang mga nagsakay sa 6 x 6 tungod sa impact sa buto sa eksplosibo. 

Nakalabay ang lima ka minutos ayha nakaabot ang laing tropa nila aron pag-rescue.  Ang mga sundalo nga kintahay nag-rescue, nagpataka pagpamusil punting bisan asa nga nakaigo sa usa ka batan-on nga naglampas sa pilapil sa ilang basakan. Gawas sa boto sa eksplosibo, wala nay laing boto nga naggikan sa tampi sa mga NPA. Busa, klaro nga bunga lang sa hunahuna sa mga sundalo sa 29th IB ang ilang estorya sa 10-ka minuto nga sinukliay og bala.

Bisan unsaon pagpangulipas sa militar ug kapulisan ang kaswalti sa maong hitabo, dili matago sa daghang mga lumulupyo sa palibot, mga lumalabay sa nahitaboan ug mga nanimuyo silingan sa ilang kampo ang tinuod nga ihap sa ilang kaswalti.

Kining maong hitabo tin-aw nga nagbutyag sa pagka-bakak sa mga pamahayag sa mga tigpamaba sa AFP ug PNP nga hugot silang nagsunod sa mando sa SOMO ug SOPO sa ilang itoy nga presidenteng si BS Aquino.  Hangtud karon, wala nagwidro ang usa ka platun nga tropa sa 29th IB nga nagpabilin pa sa Sitio Bangkaling, Nongnong, Butuan City. Ang pagpadayon sa mga COPD ug ang tinalawan nga pagpusil-patay kang Brgy. Kapitan Nicasio Precioso, Sr. nga taga- Balit, San Luis, Agusan del Sur, dili kaduha-duhaang binuhatan sa mga pasistang kasundaluhan nga maoy tinuod nga nagasabwag og terorismo sa kabukiran bisan panahon sa Kapaskuhan.

Sa laing bahin, ang tanang yunit gerilya sa New People’s Army ug mga milisyang bayan, hugot nga mosanong sa mando sa Komite Sentral sa Partido Komunista sa Pilipinas sa pagsuspende sa tanang opensibang aksyon sa Disyembre 24 hangtud 26 sa pagsaulog sa pasko ug ika-46 nga anibersaryo sa PKP, Disyembre 31 hangtud Enero 1, 2015 sa pagsugat sa bag-ong tuig, ug Enero 15 ngadto sa 19, 2015 sa pagbisita sa Pilipinas ni Pope Francis.

Panahon niining deklarasyon sa ceasefire, magpabiling alerto, aktibong magdepensa, ug andam makig-away ang tanang mga yunit sa NPA ug milisyang bayan aron depensahan ang kaugalingon kung dunay ilunsad nga sekretong pagpangatake ang mga tropa sa APF ug kapulisan o kaha sa pagpakgang sa bisan unsang pagsulay sa paghimo og bangis nga pagpasipala sa katawhan.